2 vieraśnia ŭ Tyraspali buduć adznačać 15-ty Dzień niezaležnaści. Ale biznesmenam «Šeryfu», jakija kantralujuć prydniastoŭskuju ekanomiku, stanovicca ciesna ŭ ramkach niepryznanaj PMR. Jany marać vyjści na šyroki prastor, a dziela hetaha patrebny sajuz z Małdovaj u lubym farmacie — kanfederacyja abo federacyja.

Siastra-blizień

Parada adeptam režymu, što źbirajucca za miažu. Kab paźbiehnuć cyvilizacyjnaha šoku, nabyvajcie tury ŭ Prydniastroŭje. Biełaruskich naviednikaŭ Tyraspalu čakaje siurpryz: stalica niepryznanaj Prydniastroŭskaj Małdaŭskaj Respubliki jak dźvie kropli vady padobna da stalicy sioletnich «Dažynak» — Słucku. Budaŭniki farsirujuć kapitalny ramont budynku vakzału, ichnyja kalehi ŭ režymie cajtnotu mościać plitkaj hałoŭnuju aveniu horadu — Imia 25 kastryčnika. 2 vieraśnia tut buduć adznačać Dzień niezaležnaści.

15 hadoŭ tamu na chvali pratestu suprać miascovaha zakonu ab movach Prydniastroŭje de-fakta stała asobnaj krainaj sa svaim vojskam, hrašyma z vyjavaj Suvorava i navat himnam, što śpiavajecca na matyŭ saviecka-rasiejskaha.

PMR, abo, jak ździekliva nazyvajuć u Kišyniovie, PaMidoRyja, była stvorana za čatyry hady da prychodu da ŭłady A.Łukašenki, jaki taksama abapiraŭsia na analahičnyja lozunhi. Tamu režym na levym bierazie Dniastra možna razhladać i jak futuralahičnuju prajekcyju RB — pahatoŭ aluzii pamiž PMR i RB nie skančajucca na kanstatacyi faktu idejnaj harmonii lideraŭ abodvuch dziaržaŭnych farmacyj.

Prydniastroŭski «baćka» — Ihar Śmirnoŭ — zadoŭha da biełaruskaha adkarektavaŭ kanstytucyju, atrymaŭšy prava balatavacca na najvyšejšy post bieźlič razoŭ. Rasieja amal na chalavu transpartuje siudy syravinu. Jak śled — haspadarka kvitnieje, i Śmirnoŭ u kožnym publičnym vystupie nie hublaje mahčymaści ŭščyknuć svajho małdaŭskaha kalehu Varonina: «A ŭ nas na kuchni haz, a ŭ vas?» I takoj biady, što jon vinny Maskvie kala miljarda dalaraŭ.

«Pracy ŭ nas bahata»

Aktyvisty niaŭradavych arhanizacyj pierad razmovaj z zamiežnikami vyklučajuć mabilniki, kab uniknuć prasłuchoŭvańnia supracoŭnikaŭ Mindziaržbiaśpieki. Pracy prydniastroŭskim čekistam chapaje. Kraj žyvie ŭ stanie dyplamatyčnaj blakady. Tamu hałoŭnaj zadačaj naščadkaŭ Dziaržynskaha, kali mierkavać pa presie, źjaŭlajecca pieraśled, pošuk i departacyja čynoŭnikaŭ Ministerstva reintehracyi Małdovy (MRM).

Tak, 3 žniŭnia złavili čarhovaha Džejmza Bonda — Vasila Šova, dyrektara MRM, jaki prabraŭsia na tyraspalski stadyjon, na matč kvalifikacyi Lihi čempijonaŭ pamiž miascovym «Šeryfam» i białhradzkim «Partyzanam». Ale pilnaje voka MDB adfiltravała ministra ŭ natoŭpie tyfozi. Šova departavali na pravy bierah jak «destabilizatara hramadzkaj sytuacyi» za namier «źniščyć dziaržaŭnaść PMR».

Zrešty, tut nia ŭsio tak i minorna. U miascovym parlamencie pracirajuć štany ažno dva apazycyjnyja deputaty. Apuścim toje, što apazycyjaneraŭ asabista pryznačyŭ Śmirnoŭ — kab zachoŭvali imidž demakratyi. Vielmi padobna da sytuacyi z Hajdukievičam i Abramavaj.

Choć adzinaja niezaležnaje vydańnie «Novaja Hazieta» drukujecca ŭ Kišyniovie, ułady z bolšym taktam staviacca da žurnalistaŭ. «Niačesnych» na «chimiju» nie adpraŭlajuć, a zaprašajuć u «kantoru», dzie za kubkam harbaty pierakanaŭča davodziać, što miascovy klimat nie pasuje ich zdaroŭju. Miascovy «Markievič» usio razumieje i cicha źjaždžaje ŭ Kišynioŭ abo Adesu.

Kali j zastaniecca ŭ jaho niepryjemny asadak ad prydniastroŭskich paradkaŭ, to chiba pa darozie ŭ emihracyju. Kožny pierachodny punkt u PMR — asobny feod. Jaho siuzeren — pamiežny aficer, moža zapatrabavać 25 «suvorykaŭ», a moža prosta prapuścić, ad usiaho serca pieradaŭšy pryvitańnie biełaruskamu prezydentu.

Imperyja «Šeryfa»

Švendajučysia pa Dubasarach, pasprabavaŭ znajści chacia b adzin pabudavany nie za savieckim časam budynak. I znajšoŭ: novy supermarkiet firmy «Šeryf».

«Respublika Šeryf» — druhoje, niefarmalnaje, imia PMR. Kampanija, stvoranaja pry ŭdziele śmirnoŭskaha kłanu, kantraluje amal usie sektary ekanomiki.

Staŭleńnie nasielnictva da manapolii ambivalentnaje. Z adnaho boku, tutejšyja hanaracca, što «šeryfy» pabudavali adzin z najbujniejšych u Eŭropie spartovych kompleksaŭ. Ź inšaha, nie chavajuć lumpenskich instynktaŭ: centar Tyraspalu nahadvaje placoŭku pad karparatyŭnuju viečarynu: kazino «Šeryf» padmirhvaje neonavaj reklamaj bukmekierskaj kantory «Šeryf».

Nasamreč karparacyja — bomba zapavolenaha dziejańnia pad sučasny režym Śmirnova.

Biznesmenam «Šeryfu» ciesna ŭ ramkach niepryznanaj PMR. Jany marać vyjści na šyroki prastor, a dziela hetaha patrebny sajuz z Małdovaj u lubym farmacie — kanfederacyja abo federacyja. Małdova zhodna na taki plan, adnak Śmirnoŭ i Maskva naŭrad ci pahodziacca.

Tamu «Šeryf» pačaŭ svaju hulniu. Letaś padčas vybaraŭ u miascovyja orhany ŭłady na fonie ahulnaj apatyi karparacyja investavała hrošy ŭ svaich kandydataŭ. Siońnia hetyja ludzi kantralujuć šmat miascovych savietaŭ. Ciapier usie čakajuć śniežańskich vybaraŭ u parlament. Zhulaje «Šeryf» znoŭ svaju partyju, — značyć, na vybarach prezydenta ŭ 2006 h. pasprabuje prapichnuć u prezydencki fatel svajho čałavieka.

Toj, chto pieramoža ŭ schvatcy za kiraŭnictva PMR, atrymaje niezvyčajny padarunak. U hałoŭnuju trybunu, ź jakoj kiraŭnictva PMR prymaje 2 vieraśnia parady, u 1967 h. pracoŭnyja zamuravali kapsułu z pasłańniem da naščadkaŭ, jakuju treba dastać akurat 7 listapada 2017 h. Nijakaj intryhi ŭ tekście pasłańnia niama — heta epistalarnaje pasłańnie pra kamunizm dy mir va ŭsim śviecie.

Intryha palahaje ŭ tym, chto praz 11 hadoŭ dastanie tuju kapsułu. Syn Śmirnova, syn dyrektara «Šeryfa» albo syn Varonina.

Клас
0
Панылы сорам
0
Ха-ха
0
Ого
0
Сумна
0
Абуральна
0