Ministerstva pa nadzvyčajnych situacyjach Biełarusi vystupaje za viartańnie ŭ školnuju prahramu kursa "Asnovy biaśpieki žyćciadziejnaści" (ABŽ) u jakaści abaviazkovaha pradmieta i ŭviadzieńnie pa im zaliku ci ekzamienu. Pra heta paviedamiŭ načalnik upraŭleńnia nahladu i prafiłaktyki MNS Uładzimir Rafalski na pres-kanfierencyi ŭ Minsku 5 červienia.

Pavodle słoŭ Rafalskaha, inicyjatyva MNS była padtrymanaja Dziaržaŭnym sakrataryjatam Savieta biaśpieki, a Ministerstva adukacyi atrymała daručeńnie namieśnika premjer-ministra Biełarusi Anatola Tozika prapracavać heta pytańnie.

"Zaraz idzie praca ŭ hetym kirunku. Upeŭnieny, što ŭ chutkaj budučyni ABŽ budzie ŭklučana ŭ abaviazkovuju navučalnuju prahramu i pa im budzie zdavacca zalik", — skazaŭ Rafalski.

Pavodle jaho słoŭ, navat kali abjom kursa budzie nievialikim, jon "usio roŭna vielmi važny" dla dziaciej, jakich nieabchodna navučyć biaśpiečnym pavodzinam na vadzie, pry pažary, chaładach i inšych nadzvyčajnych situacyjach.

Aprača taho, MNS hatova akazvać pasłuhi pa navučańni, padrychtoŭcy i pierapadrychtoŭcy vykładčykaŭ kursa ABŽ. Pavodle słoŭ Rafalskaha, dla taho kab vieści hety pradmiet, nie aviazkova atrymlivać vyšejšuju pažarnuju adukacyju, i vykładčyku budzie dastatkova tych viedaŭ, jakija jon atrymaje ciaham 2—4-tydniovych kursaŭ.

Kurs ABŽ byŭ vyklučany sa školnaj prahramy ŭ 2008 hodzie, kali siaredniaja škoła pierachodziła z 12-hadovaj na 11-hadovuju adukacyju, i zaraz vyvučajecca na fakultatyvach.
MNS i DAI nieadnarazova ŭźnimali pytańnie ab viartańni kursa ABŽ u školnuju prahramu, ale pytańnie dahetul zastajecca niavyrašanym.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?