15–17 lipienia kiraŭnik Biełarusi ździejśniŭ svoj siomy vizit u Kitajskuju Narodnuju Respubliku. U Padniabiesnaj adbylisia sustrečy sa staršynioj KNR Si Czińpinam, a taksama — z premjeram Dziaržaŭnaj rady KNR Li Kecianam i sa staršynioj Usiekitajskaha kamiteta Narodnaha palityčnaha kansultatyŭnaha savieta Juj Čženšenam.

Kitajskaje ahienctva «Sińchua» pieradaje, što «krainy damovilisia ab usiebakovym stratehičnym partniorstvie». Kitajski bok padziakavaŭ Łukašenku za «usialakuju padtrymku ŭ pytańniach suvierenitetu i terytaryjalnaj cełasnaści krainy».

Što ž zastałosia ŭ suchoj za astačy za šmatsłoŭnymi kamplimientami? Kitaj dla Biełarusi — heta adzin z hałoŭnych handlovych partnioraŭ. Tavarazvarot pamiž našymi krainami letaś skłaŭ kala 3 miljardaŭ dalaraŭ. Ličba davoli ŭnušalnaja. Ale jość prablema — absalutnuju bolšaść składaje impart kitajskich tavaraŭ u Biełaruś.

Kali ź Minska ŭ Padniabiesnuju apošnija siem hadoŭ kolkaść tavaraŭ idzie prykładna adnolkava, i heta kalijnyja ŭhnajeńni, to ŭ zvarotnym kirunku pavialičvajecca štohod. Jašče ŭ 2005 hodzie Biełaruś mieła stanoŭčaje salda ŭ handli z Kitajem (430 miljonaŭ ekspartu na 284 miljony impartu), a letaś salda stała vyhladać prosta katastrafična (433 miljony ekspartu na 2 367 miljonaŭ impartu).

Ministr zamiežnych spravaŭ Biełarusi Uładzimir Makiej abviaściŭ, što pa vynikach vizitu Łukašenki ŭ Kitaj zaklučanyja pahadnieńni na ahulnuju sumu 1,5 miljarda dalaraŭ. «Padpisanyja dekłaracyi vyvodziać našy adnosiny na ŭzrovień usiebakovaha stratehičnaha raźvićcia», — skazaŭ Makiej.

Ekanamist Siarhiej Čały ŭ kamientary dla «Našaj Nivy» zaznačyŭ, što biełaruskich pastavak u Kitaj tam budzie na niekalki socień tysiač dalaraŭ, usio astatniaje — znoŭ impart, abstalavańnia i prac. «Admoŭnaje salda ŭ handli z Kitajem — heta niepieraadolnaja strukturnaja prablema. Čym bolšy tavarazvarot, tym bolšaje admoŭnaje salda. Faktyčna, kitajcy kredytujuć nas dziela pašyreńnia svajho ekspartu», — pierakanany Siarhiej Čały.

Pahadnieńni na 1,5 miljarda dalaraŭ — heta mnoha ci mała? Dla Biełarusi ličba istotnaja, tut Makiej nie kryvić dušoj. Ale paraŭnać z ulivańniami, jakija robiacca ŭ biełaruskuju ekanomiku z boku Rasii nielha. Ličba niedaciahvaje.

Možna paraŭnać hetyja 1,5 miljarda z kantraktami, jakija Łukašenka zaklučaŭ u inšych vizitach. Naprykład, padčas sioletniaha vizitu ŭ Paŭdniova-Uschodniuju Aziju kantraktaŭ, kali vieryć Makieju, było zaklučana na 400 miljonaŭ dalaraŭ. Heta pry tym što Sinhapur i Indanezija nie ŭvachodziać u śpis asnoŭnych partnioraŭ Biełarusi. Niekali ź Vieniesueły Łukašenka pryvoziŭ kantraktaŭ — nibyta — na 5 miljardaŭ. Tamu hetyja 1,5 miljarda ad druhoj ekanomiki śvietu vyhladajuć davoli ścipła.

Asabliva, kali paraŭnać układańni Kitaja ŭ inšyja krainy śvietu. Pakiniem pa-za ŭvahaj krainy azijackaha rehijona, kudy pa zrazumiełych pryčynach, ulivańni najbolšyja. Źvierniemsia da krain Afryki, dzie Kitaj sapraŭdy zacikaŭleny ŭ svajoj prysutnaści.

Naprykład, z Demakratyčnaj Respublikaj Konha, dzie jość vialikija zapasy miedzi, śvinca, urana, cynka, ałmazaŭ, u 2007–2008 hadach Kitaj zaklučyŭ kantraktaŭ na sumu bolš za 9 miljardaŭ dalaraŭ. U asnoŭnym hetyja hrošy pajšli na hornazdabyvajučyja prajekty, a taksama na transpartnuju i telekamunikacyjnuju infastruktury. Niešta padobnaje tyčycca Nihieryi, Sudana, Zambii, Tanzanii dy inšych krain Afryki.

«Valutnych reziervaŭ u Kitai dastatkova. Ich treba, viadoma ž, kudyści inviestavać», — krasamoŭnaja cytata Łukašenki ź intervju ahienctvu «Sińchua». Adnak Kitaj inviestuje najpierš tudy, dzie jość syravina, jakoj brakuje jaho ekanomicy. U Biełarusi takoj syraviny niama. A padtrymka Biełaruśsiu terytaryjalnaj cełasnaści Kitaja — sprava dvaccać piataja.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?