Uzdym zachvorvańnia na hryp hetaj zimoj čakajecca ŭ tradycyjnyja terminy: u kancy studzienia — lutym,

paviedamiła zahadčyca epidemijałahičnaha adździeła Minskaha haradskoha centra hihijeny i epidemijałohii (MHCHiE) Iryna Hlinskaja na pres-kanfierencyi ŭ Minsku 18 vieraśnia.

Pavodle jaje słoŭ, zachvorvańnie čakajecca siaredniaj intensiŭnaści. Pry hetym śpiecyjalist padkreśliła, što šmat zaležyć ad kožnaha čałavieka, i zaklikała vakcynavacca ad hrypu.

Kali pryščeplivajecca 10–20% nasielnictva, to pracuje tolki indyvidualny imunitet, a kali 70–80%, to i kalektyŭny. Heta aznačaje, što dziakujučy značnaj kolkaści pryščeplenych nie chvarejuć i tyja, chto nie vakcynavaŭsia, padkreśliła Hlinskaja.

Kalektyŭny imunitet pačynaje efiektyŭna pracavać pry vakcynacyi 40–50% nasielnictva. Sioleta ŭ Minsku płanujecca vakcynavać suprać hrypu 673 tys. čałaviek, ci 35% nasielnictva stalicy.

Hlinskaja adznačyła, što vakcynacyja nieabchodnaja najpierš dla prafiłaktyki ciažkich form zachvorvańnia i ŭskładnieńniaŭ.

Asabliva važna pryščapić starych i dziaciej, jakija majuć chraničnyja zachvorvańni. Jana zaklikała pryščeplivacca sastarełych ludziej (letaś u Minsku było pryščeplena 20% ludziej starej za 65 hadoŭ).

Namieśnik hałoŭnaha ŭrača Haradskoj dziasiataj infiekcyjnaj balnicy Tamara Lisickaja adznačyła, što 50% zachvarełych na hryp u minułym hodzie — dzieci. Śpiecyjalist taksama zaklikała pryščeplivać ich ad hrypu.

Epidemijołah nahadała, što kali na čaćviortyja sutki pry vostrym reśpiratornym zachvorvańni nie nastupaje palapšeńnie (trymajecca tempieratura, jakuju nie ŭdajecca źnizić lekami; palapšeńnie stanu źmianiłasia paharšeńniem; uzmacniŭsia kašal) nieabchodna nieadkładna źviarnucca da ŭrača. Taksama terminova źviartacca da miedykaŭ nieabchodna, kali dzicia straciła prytomnaść, u jaho adznačajucca sutarhi, hałaŭny bol u spałučeńni ź irvotaj, syp, a taksama vysokaja tempieratura, jakaja nie źnižajecca praz 30–40 chvilin paśla pryjomu miedykamientaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?