«Pa kolkaści balničnych łožkaŭ, abjomaŭ špitalizacyi i kolkaści naviedvańniaŭ uračoŭ Biełaruś siońnia lidziruje i siarod krain SND, i siarod krain Jeŭrasajuza»,

— paviedamiŭ u svaim vystupleńni na mižnarodnaj navukova-praktyčnaj kanfierencyi «Ekanamičnyja aśpiekty zdaroŭja i sistemy achovy zdaroŭja» namieśnik ministra achovy zdaroŭja našaj krainy Ihar Łasicki. Jaho słovy cytuje Źviazda.

Tak, letaś na 100 žycharoŭ u Biełarusi prypała bolš jak 30 špitalizacyj. A kolkaść naviedvańniaŭ uračoŭ skłała 13,2 u raźliku na adnaho biełarusa.

«Kab pavysić ekanamičnuju efiektyŭnaść sistemy achovy zdaroŭja, nam nieabchodna skiravać svaju ŭvahu na praźmiernaść abjomaŭ miedycynskaj dapamohi — heta značyć, zmahacca ź nieracyjanalnym vykarystańniem łožkavaha fondu, źmienšyć kolkaść špitalizacyj, vyklikaŭ chutkaj miedycynskaj dapamohi i kolkaść naviedvańniaŭ ambułatorna-polikliničnaha źviana, — padkreśliŭ Ihar Łasicki.

— Biełaruś, jak i mnohija inšyja krainy, sutyknułasia ŭ apošnija hady z rostam vydatkaŭ na achovu zdaroŭja, pryčym hetyja vydatki rastuć chutčej, čym uzrovień našaha dabrabytu. Pa prahnozach daśledčykaŭ, da 2020 hoda ŭ sistemu achovy zdaroŭja krain Zachodniaj Jeŭropy buduć nakiroŭvacca 12—15% ad unutranaha vałavoha praduktu. U Biełarusi ŭ 2014 hodzie vydatki na achovu zdaroŭja składuć 4,2% ad unutranaha vałavoha praduktu, što adpaviadaje 34 trłn rubloŭ. Heta vielmi bujnaja suma… Upeŭnieny, što ŭ asnovie efiektyŭnaj dziejnaści sistemy achovy zdaroŭja pavinna lažać nie prosta naroščvańnie vydatkaŭ, a efiektyŭnaje raźmierkavańnie i efiektyŭnaje vykarystańnie našych resursaŭ.

Jak zaznačyŭ Ihar Łasicki, siońnia hałoŭny akcent pieranosicca na ambułatorna-polikliničnaje źviano, pakolki dapamoha, što akazvajecca na pieršasnym uzroŭni, — najbolš dastupnaja, zapatrabavanaja i mienš darahaja.

Ad jakaści akazańnia pieršasnaj dapamohi ŭ mnohim zaležać i jakaść žyćcia pacyjenta, i dola ekanamičnych vydatkaŭ na jaho miedycynskaje supravadžeńnie. Sioleta ŭ ambułatorna-polikliničnuju słužbu budzie nakiravana kala 40% ad usich vydatkaŭ na achovu zdaroŭja.

Dla palapšeńnia absłuhoŭvańnia pacyjentaŭ u ambułatorna-polikliničnych arhanizacyjach było praviedziena pieraasnaščeńnie paliklinik, pierahledžany standarty i kliničnyja pratakoły. Aktyvizavana rabota pa ŭkaranieńni stacyjanarazamiaščalnych technałohij, stvarajucca centry kalektyŭnaha vykarystańnia darahoha abstalavańnia, raźvivajecca instytut pamočnika ŭrača. Uračy atrymali prava vydavać pacyjentam listok niepracazdolnaści terminam da 10 dzion, a taksama vypisvać recepty pacyjentam z chraničnymi zachvorvańniami i pacyjentam ilhotnych katehoryj terminam na paŭhoda.

— My pradjaŭlajem da jakaści raboty ambułatorna-polikliničnaha źviana samyja vysokija patrabavańni: hetyja arhanizacyi pavinny być filtrami, jakija prapuskajuć praz sabie nasielnictva, usiebakova aceńvajučy jaho zdaroŭje, — padkreśliŭ Ihar Łasicki.

— Jany pavinny brać pad ulik kožny vypadak zachvorvańnia, pryznačać svoječasovaje i adekvatnaje lačeńnie, nazirać za źmianieńniami ŭ stanie zdaroŭja pacyjenta, prymianiać na praktycy mietady prafiłaktyki. Nie sakret, što, kali pieršasnaje źviano pracuje nieefiektyŭna, a ŭračy prapuskajuć chvarobu na pačatkovym etapie, heta ciahnie za saboj nieabchodnaść zadziejničać stacyjanarnuju dapamohu — vysokatechnałahičnuju i bolš darahuju.

Ale i ŭ stacyjanarnych arhanizacyjach finansavyja srodki pavinny pracavać efiektyŭna. Tak, prastoj balničnaha łožka nie tolki nie skaračaje abjomy stacyjanarnaj dapamohi, što finansujucca ź biudžetu, ale i paharšaje miedycynskaje absłuhoŭvańnie nasielnictva ŭvohule. Łožak, jaki pracuje nieefiektyŭna, finansujecca ŭ pamiery 2/3 ad łožka, jaki pracuje efiektyŭna. Praściej kažučy, pusty balničny łožak usio roŭna zabiraje srodki…

Клас
0
Панылы сорам
0
Ха-ха
0
Ого
0
Сумна
0
Абуральна
0