Jeŭramajdan vyvieŭ Ukrainu na pieršyja pałosy. A na Jeŭramajdanie rej viaduć muzyki. «Naša Niva» vyrašyła nahadać pra najbolš jaskravych ukrainskich vykanaŭcaŭ. Choć ukraincy — nastolki śpieŭnaja nacyja, što ŭ top-10 uvieś śpis dasiahnieńniaŭ ukrainskaj muzyčnaj kultury ukłaści niemahčyma.

Vopli Vidoplasova

Biassprečnaja kłasika.

Brati Hadiukini

Heta značny ŭkrainski rok-hurt, jaki isnavaŭ da 2006 hoda. Śmierć frantmena Siarhieja Kuźminskaha ŭ 2009-m pierakreśliła mahčymaść uźjadnańnia. Pry hetym «Brati» nie zapisali nivodnaha drennaha alboma. Inakš jak ukrainskimi The Rolling Stones ich nie nazavieš.

Okiean Jelzi

Hurt Śviatasłava Vakarčuka źbiare 8 śniežnia «Minsk-Arenu», i kali pryjedzie praz paŭhoda — to źbiare jaje jašče raz. Papularnaść «Okieana» nadzvyčajnaja, heta dobry prykład jakasnaj muzyki bolš sučasnaha hučańnia.

Miertvij Pivień

Zachodnieŭkrainski «Pivień», jaki aktyŭna supracoŭničaŭ z paetam Juryjem Andruchovičam, maje nastolki vialiki pośpiech u Lvovie, što ŭ kožnaj suvienirnaj łaŭcy vy znojdziecie ź dziasiatak roznych sakołak z cytatami z tvorčaści «Piŭnia».

DachaBracha

Adzin z hałoŭnych pramoŭteraŭ Rasii, Alaksandr Čaparuchin, jaki pracavaŭ z pałovaj zorak suśvietnaha maštabu, letaś nazvaŭ tvorčaść hurtu samym cikavym, što za apošni čas źjaviłasia ŭ suśvietnaj muzycy. I niadaŭni supolny albom ź biełarusami Portmone jašče raz dakazaŭ, što roŭnych u svaim kirunku ŭ «DachiBrachi» niama.

Rusłana

Pieramožca Jeŭrabačańnia ŭ 2004, aktyŭnaja ŭdzielnica abodvuch Majdanaŭ, stvaraje jakasnuju pop-muzyku. Pa słovach krytyka Źmitra Padbiarezskaha, Rusłana i Alaksandr Panamaroŭ — vielmi talenavityja ludzi, jakija pakazvajuć sapraŭdny kłas u pop-muzycy. Toj vypadak, kali słova «pop» u dačynieńni da muzyki nie łajankavaje.

Płač Jeriemiji

Jašče adny rok-kłasiki Ukrainy, jakija vydatna spałučajuć rok-matyvy i hłybokuju liryku. Pieśnia «Vona» pryznanaja «samym zapaminalnym ukrainskim chitom apošniaj čverci stahodździa» pa mierkavańni čytačoŭ @music.

RadyjoBend Alaksandra Fokina

Ukrainski džaz — tema asobnaha daśledavańnia, bo słavutych imionaŭ tam niamała. Pa słovach znaŭcy džaza Źmitra Padbiarezskaha bih-bend Alaksandra Fokina varty ŭvahi. Palitra stylaŭ ad fanka i łaciny da rytm-n-bluza i ejsid-džaza zasłuhoŭvaje pavahi. Doŭhi śpis zachodnich muzykantaŭ, ź jakimi pracavaŭ RadyjoBend, prykładajecca.

Pikardijśka tiercija

Kali chto čuŭ choć adnu pieśniu «Tercyi» ŭ zapisie ci žyŭcom, nikoli ich ni z kim nie zbłytaje — sekstet vakalistaŭ, jakija śpiavajuć a kapeła ŭ roznych žanrach moža padabacca abo nie, adnak abyjakavym nie pakinie nikoha. Muzyki śpiavajuć na 12 movach śvietu, i treba čuć, jak jany heta robiać.

Potap i Nastia

Ukrainski ruskamoŭny duet Patapa i Naści Kamienskich treba ŭzhadać chacia b tamu, što ŭvieś minuły (dyj pazaminuły hod taksama) my słuchali ich pieśni, navat kali taho nie žadali – jany nieślisia z kožnaha mabilnaha telefona i kožnaj radyjokropki. Treba skazać, što ŭ ich pieśni zakładziena vialikaja dola ironii, što nie ŭsie słuchačy razumiejuć. Praŭda, jość ludzi, jakija mohuć słuchać «U nas na rajonie nie zvonJat, a zvOniat» na poŭnym surjozie.

Vierka Siardziučka

Prajekt Andreja Daniłka staŭ fienamienalna papularnym u siaredzinie nulavych: pieśni Vierki Siardziučki stali abaviazkovaj častkaj luboha telešou i dyskateki.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?