Dyrektar Biełaruskaha respublikanskaha teatra junaha hledača (TIUH) u Minsku Mikałaj Kaziulin 11 lutaha pakinuŭ pasadu kiraŭnika TIUHa. Pra heta paviedamili ŭ pryjomnaj dyrektarata teatra. 

Zvalnieńniu Kaziulina papiaredničaŭ kanflikt z kalektyvam TIUHa, jaki ŭźnik z-za razychodžańnia ŭ pohladach na tvorčuju dziejnaść teatra. Dyrektara vinavacili ŭ nieprafiesijanaliźmie i ideałahizavanym padychodzie da tvorčaści, a jon, u svaju čarhu, ličyŭ, što kalektyŭ teatra zahraz u kansiervatyźmie, i zajaŭlaŭ pra hatoŭnaść syści pa ŭłasnym žadańni. 

25 studzienia na ahulnym schodzie trupy kalektyŭ abviaściŭ Kaziulinu votum niedavieru. Anałahičnaja situacyja adbyłasia na schodzie 6 lutaha, dzie prysutničali namieśnik staršyni Minharvykankama Ihar Karpienka i načalnik upraŭleńnia kultury harvykankama Vitalina Rudzikava. 

U kancy minułaha tydnia, pierad tym, jak napisać zajavu pra zvalnieńnie, Kaziulin paviedamiŭ, što jon nie syšoŭsia z mastackim kiraŭnikom TIUHa Uładzimiram Savickim «u bačańni śpiecyfiki raźvićcia teatra». 

«Ja liču, što jon pavinien być teatram dla dziaciej — dobrym. U TIUHu šmat hadoŭ panuje niadobraja enierhietyčnaja atmaśfiera. TIUH źjaŭlaŭsia prablemnym teatram, kali znachodziŭsia ŭ padparadkavańni Minkultury, i zastaŭsia takim, kali jaho pieradali horadu. Tut nie prymajuć ničoha novaha, taho, što idzie ŭ nahu z časam, što dazvalaje rabić cikavyja prajekty. Na moj pohlad, u teatry zaraz kožny adstojvaje svaje vuzka karyślivyja intaresy. Ja čałaviek dziaržaŭny, i mnie cikava, kab biudžetnyja hrošy pracavali, i heta realna. Pakul u teatry tolki tracina artystaŭ maje ščylny hrafik. U naviedvańni teatra zadziejničany administracyjny resurs», — skazaŭ zaraz užo były kiraŭnik TIUHa. 

Dla tvorčaha aktyvu teatra infarmacyja ab tym, što Mikałaj Kaziulin syšoŭ z pasady dyrektara, stała navinoj. Zahadčyca litaraturna-dramatyčnaj častki TIUHa Žanna Łaškievič paviedamiła, što nie viedaje, da kaho piarojduć abaviazki pa kiraŭnictvie teatram.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?