U centralnaj častcy ofisna-haściničnaha kompleksu raźmiaščajecca zona łobi i resepšen, dzie buduć prymać naviedvalnikaŭ haścinicy. Pierad centralnym uvachodam ciapier chutkimi tempami idzie dobraŭparadkavańnie terytoryj padjaznoj i razhruznaj zony, kab stvaryć maksimalna kamfortnyja ŭmovy dla zasialeńnia ŭ hatel.
Samo pamiaškańnie łobi vyhladaje dosyć futurystyčna, a mietaličnyja kałony z adhalinavańniami nahadvajuć džunhli, ekzatyčnyja drevy jakich padtrymlivajuć stolu, što spaŭzaje ŭniz. Hałoŭny architektar abjekta Kazis Kierucis raspavioŭ, što ŭ centry hetaha pamiaškańnia płanavałasia raspalić alimpijski ahoń. «Inviestary dla realizacyi hetaj zadumki chacieli padvieści hazavyja truby, kab zapalić połymia, a ciapło ad jaho płanavałasia vykarystać dla abahrevu choła. Ale pakolki sa źmienaj inviestaraŭ kancepcyja pamianiałasia, kab abyhrać hetu vialikuju prastoru, vyrašyli vykarystoŭvać roznaje aśviatleńnie. Tak, na stoli buduć ustalavany pryhožyja hrupy śviacilniaŭ, jakija buduć źvisać na roznych uzroŭniach», - adznačyŭ architektar.
Na pieršym paviersie budynka taksama raźmiaścilisia vialikaja kanfierenc-zała, spa -zona z basiejnam, tureckaj łaźniaj i finskaj saŭnaj, a taksama masažnymi kabinietami.
Taksama na pieršym paviersie znachodzicca restaran. Tam užo ŭ poŭnym abjomie vykanana azdableńnie, zaviaršajucca elektramantažnyja pracy i ŭstanoŭka mebli. Restaran raźličany prykładna na 150 pasadačnych miescaŭ.
U «Viktoryi Alimp» 234 numary roznaj kamfortnaści, jakija mohuć źmiaścić 482 čałavieka. Mebla dla ŭładkavańnia numaroŭ ajčynnaj vytvorčaści, jaje pastaŭščyk - «Pinskdreŭ». Na 9 - m i 10- m pavierchach taksama budzie pa adnym numary kłasa luks, jakija pryniata nazyvać prezidenckimi. Hetyja numary taksama znachodziacca na zaviaršalnaj stadyi ŭładkavańnia i mantažu abstalavańnia.
U padvale znachodziacca parkoŭki dla piersanału haścinicy i ofisnych rabotnikaŭ. Što tyčycca kanstruktyŭnych rašeńniaŭ, to sam budynak manalitna-karkasny sa šklanymi fasadami i azdableńniem z kieramahranitnych plit. Pry ŭźviadzieńni ofisna-haściničnaha kompleksu kala štab-kvatery NAK Biełarusi ŭ asnoŭnym užyvalisia biełaruskija budaŭničyja materyjały.
Budaŭnictvam abjekta zajmajecca AAT «Budtrest № 3 ordena Kastryčnickaj revalucyi «, jakoje ŭvachodzić u strukturu Ministerstva architektury i budaŭnictva. Hatoŭnaść kompleksu ŭ ciapierašni čas składaje kala 98%, i ŭ adpaviednaści z ukazam Prezidenta haścinica i ofisnaja častka budynka buduć uviedzieny ŭ ekspłuatacyju ŭ pieršym kvartale hetaha hoda. Płanujecca, što 25 sakavika abjekt budzie pradjaŭleny pryjomačnaj kamisii. U Minbudarchitektury taksama ličać, što abjekt budzie zdadzieny ŭ vyznačanyja terminy.
Sama ideja pabudavać u Minsku štab-kvateru Nacyjanalnaha alimpijskaha kamiteta i haścinicu paŭstała prykładna 10 hadoŭ tamu. Spačatku płanavałasia zrabić štab-kvateru, abjadnanuju z hatelem i spadarožnymi pamiaškańniami, ale zatym kancepcyja abjekta źmianiłasia, źjavilisia novyja patrabavańni, i tady było pryniata rašeńnie adździalić hetyja dva budynki. « A potym, kab akupić vydatki, było vyrašana zrabić jašče i ofisny korpus. Pakolki heta asobny budynka, naviedvalniki haścinicy i rabotniki ofisaŭ nie buduć pieraškadžać funkcyjanavańniu štab-kvatery kamiteta «, - adznačyŭ hałoŭny architektar abjekta Kazis Kierucis.
Adnak u pracesie budaŭnictva hetaha abjekta stali vyjaŭlacca kampazicyjnyja supiarečnaści, tak jak budynak štab-kvatery nievialiki i nad im staŭ daminavać bolš maštabny ofisna-haściničny kompleks. Tady, kab zrabić akcent usio ž na štab-kvatery kamiteta, na piatym paviersie hetaha budynka zrabili 40-mietrovy kupał, dzie raźmiaściłasia šmatfunkcyjanalnaja zała.
Budynak štab-kvatery Nacyjanalnaha alimpijskaha kamiteta Biełarusi ŭžo zdadzieny ŭ ekspłuatacyju i funkcyjanuje z vosieni 2013 hoda.