Biełaruś prapanuje RF raźmiaścić u siabie dadatkova da 15 samalotaŭ u suviazi aktyŭnaściu NATA kala biełaruskaj miažy. Pra heta Alaksandr Łukašenka zajaviŭ u sieradu ŭ Minsku na pasiadžeńni Rady biaśpieki pa papiarednich vynikach pieršaha etapa pravierki bojehatoŭnaści Uzbrojenych siłaŭ krainy.
«Kali ź Italii pierakinutyja [u krainy Bałtyi i Polšču] paŭtara dziasiatka samalotaŭ, ja dumaju, treba źviazacca z načalnikam Hienštaba Rasii i prapanavać im toje ŭzmacnieńnie, jakoje jany abaviazany dać nam. Zaraz, niachaj sabie, nie bolš za 12—15 samalotaŭ, pierahnać ich na terytoryju Biełarusi, vyznačyć maršruty patrulavańnia i jašče zapasnyja maršruty. Niachaj pracujuć, patrulujuć», — zajaviŭ A.Łukašenka.
Łukašenka zajaviŭ, što Zachad sprabuje napałochać Biełaruś mahčymymi nastupstvami ŭ vypadku padtrymki Rasii. Jon pryvioŭ cytaty z publikacyj zachodnich ŚMI, dzie havorycca pra toje, šot adnoj z nastupnych achviaraŭ rasijskaj ekspansii moža stać naša kraina.
«Viedajecie, vielmi tanna, — miarkuje Łukašenka. — Kali nas chočuć napałochać, to heta vielmi tanna. Nas pałochać nie treba.
Jašče raz padkreślivaju: my budziem dziejničać vyklučna ŭ adpaviednaści z narmatyŭna-pravavoj bazaj, jakaja ŭ nas isnuje pamiž Rasijaj i Biełaruśsiu. Ja ŭžo niekalki razoŭ heta ŭ adkrytuju kazaŭ: my z rasiejcami adzin narod, roŭna jak i ŭkraincy, my z adnaho dreva, my — słavianie, i my zaŭsiody budziem razam», — paŭtaryŭ jon.
U toj ža čas Łukašenka ŭstrymaŭsia ad adkrytaj padtrymki zachopu Rasijaj Kryma:
«Ale my nie źbirajemsia tut mitusicca, my nie źbirajemsia być inicyjatarami eskałacyi niejkich pracesaŭ u suviazi z ukrainskimi padziejami i supraćstajańniem Zachadu, ZŠA z adnaho boku i Rasii z druhoha», — adznačyŭ jon.
«My budziem dakładna achoŭvać intaresy našaj dziaržavy i našych siabroŭ i susiedziaŭ, sajuźnikaŭ. Tamu pałochać nas u hetych adnosinach nie varta», — reziumavaŭ jon.
«Niekatoryja (ja hladzieŭ apošni čas i siońnia ranicaj ahlad srodkaŭ masavaj infarmacyi) pačynajuć padździavać nas, što, maŭlaŭ, Łukašenka nie sastupaje cisku Kramla, pakul trymajecca», — adznačyŭ jon.
«Na mianie nichto nie ciśnie, nijakija Kreml i inšyja na mianie nikoli nie cisnuli, tamu što heta, pa-pieršaje, bieśpierśpiektyŭna abo, jak kažuć dypłamaty, kontrpraduktyŭna. Na mianie niama čaho cisnuć», — akcentavaŭ jon.
Biełaruś nie spyniała supracy z uładami ŭ Kijevie i, u adroźnieńnie ad Maskvy, nie nazyvała novy ŭrad Ukrainy nielehitymnym.
«Va Ukrainie jość palityki, jakija ŭzialisia vyrašać prablemy ŭkrainskaha naroda, — skazaŭ Łukašenka. — My ni ŭ jakim vypadku im nie pieraškadžajem. Bolš za toje, my nie pieraryvali nijakija suviazi z Ukrainaj, pierš za ŭsio ekanamičnyja. My zaŭsiody išli nasustrač pažadańniam ŭkrainskaha biznesu i da hetaha času heta robim, — zajaviŭ Łukašenka i namiaknuŭ na adkaznaść Miaśnikoviča za vybranyja ekanamičnyja zachady. — I premjer-ministru daŭno daručana kantralavać hety praces. Jon viedaje, što rabić, i ni adzin biznesoviec, ni adzin pradprymalnik, ni adzin kiraŭnik, jaki zajmajecca zamiežnaj ekanomikaj, nie skaža, što Biełaruś zajmała niejkuju nieprystojnuju pazicyju ŭ dačynieńni da Ukrainy».
Novym kiraŭnikam Ukrainy Łukašenka paraiŭ «ŭ suchoj rešcie — treba prosta pracavać, treba mienš biehać pa zamiežžach, a zajmacca ŭłasnaj krainaj i dabrabytam ułasnaha naroda».
«My pastaŭlali i pastaŭlajem tudy enierharesursy — stolki, kolki treba dla Ukrainy, pradukty, inšyja rečy. Słovam, my adkrytyja dla taho, kab padtrymlivać ŭkrainski narod u hetuju ciažkuju chvilinu, u tym liku pa humanitarnaj składnikam», — padkreśliŭ Łukašenka.
Takim čynam, Biełaruś raźličvaje i nadalej padtrymlivać Kijeŭ u pytańni Kryma, ale pry hetym raźličvaje na rasijski abarončy parason u adnosinach z Zachadam.
