Dziaržavy Jeŭrasajuza ŭzhadnili prajekt sankcyj suprać Rasii, jakija praduhledžvajuć, u pryvatnaści, vizavyja abmiežavańni i zamarožvańnie aktyvaŭ tych, chto adkazvaje za parušeńnie suvierenitetu Ukrainy.
Kali ŭ paniadziełak prajekt budzie ŭchvaleny ministrami zamiežnych spraŭ ES, heta buduć pieršyja jeŭrapiejskija sankcyi suprać Rasii ad zakančeńnia chałodnaj vajny, što stanie znakam surjoznaha abvastreńnia adnosin pamiž Uschodam i Zachadam. Pra heta śviedčyć dakumient, ź jakim aznajomiŭsia Reuters.
Siamistaronkavy tekst padrabiazna apisvaje abmiežavalnyja miery, jakija buduć užytyja suprać Maskvy, kali jana nie adydzie ad svajho kursu nakont Kryma i nie pačnie pieramovy ź mižnarodnymi pasiarednikami ab pieraadoleńni kryzisu va Ukrainie.
«Dziaržavy-ŭdzielniki ŭžyvuć nieabchodnyja miery, kab praduchilić ŭjezd na ich terytoryju abo prajezd praź jaje asob, jakija niasuć adkaznaść za dziejańni, jakija padryvajuć abo pahražajuć terytaryjalnaj cełasnaści, suvierenitetu i niezaležnaści Ukrainy», — havorycca ŭ pieršym artykule dakumienta.
Druhi tyčycca aktyvaŭ, jakija znachodziacca ŭ Jeŭrasajuzie, jon praduhledžvaje, što «ŭsie srodki i ekanamičnyja resursy, jakija naležać abo kantralujucca «tymi, chto adkazvaje za dziejańni, što padryvajuć cełasnaść Ukrainy, «buduć zamarožanyja».
Dakumient byŭ uchvaleny, paśla taho jak ŭ nivodnaj dziaržavy- ŭdzielnika nie zastałosia piarečańniaŭ suprać prajekta, skazali čynoŭniki.
Ministry zamiežnych spraŭ ES sustrakajucca ŭ Bruseli ŭ paniadziełak i, jak čakajecca, aficyjna zavieršać praceduru, kali ŭ kursie Rasii nie adbudziecca prykmietnych źmien. Da hetaha času nijakich prykmiet mahčymaj deeskałacyi kryzisu ŭ Krymu nie nazirałasia.
