Reuters.com
Kanclerka FRH Anhieła Mierkiel, vystupajučy ŭ čaćvier u bundestahu, zrabiła žorstkuju ŭradavuju zajavu pa Ukrainie, piša The Wall Street Journal.
Mierkiel vybrała redkija dla siabie mocnyja słovy. Rasija, skazała jana, padčas kryzisu va Ukrainie «dziejničała pa zakonie džunhlaŭ», niezakonna, vykarystoŭvajučy mietady z XIX st. «Zakon džunhlaŭ pieramahaje nad siłaj zakona, adnabakovyja hieapalityčnyja mierkavańni — nad pryncypami ŭzajemarazumieńnia i supracoŭnictva, — zajaviła kanclerka. — U pieryjad krajniaj niapeŭnaści va Ukrainie Rasija pakazała siabie nie partnioram i nie harantam stabilnaści susieda, ź jakim jaje źviazvajuć ciesnyja suviazi». «Rasija skarystałasia słabaściu Ukrainy», — skazała Mierkiel.
Pavodle jaje słovaŭ, kali Rasija nie źmienić svoj kurs u krymskim pytańni, jaje čakajuć «ciažkija» palityčnyja i ekanamičnyja nastupstvy.
Jana padkreśliła, što adziny vychad z kryzisu — šlach pieramovaŭ, ale zajaviła, što Jeŭrasajuz i Zachad u cełym hatovyja zamarozić rasijskija rachunki i ŭzmacnić vizavy režym, kali Rasieja «admovicca ad vynikovych pieramovaŭ».
«Kali Rasieja praciahnie iści kursam apošnich tydniaŭ, heta stanie katastrofaj nie tolki dla Ukrainy, — skazała kancler. — Heta budzie aznačać nie tolki pierahlad adnosinaŭ z Rasiejaj Jeŭrasajuzam jak adzinym cełym. Heta budzie aznačać, u čym ja ćviorda pierakananaja, ciažki ŭdar pa Rasii — jak u ekanamičnym, tak i ŭ palityčnym sensie».
«Terytaryjalnaja cełasnaść Ukrainy nie padlahaje sumnievu i abmierkavańniu», — padkreśliła jana. Situacyja ŭ Krymie nieparaŭnalnaja z Kosavam, ličyć Hiermanija.
Raniej, 2 sakavika, u razmovie z prezidentam ZŠA Barakam Abamam Mierkiel vykazała mierkavańnie, što prezident Rasii Uładzimir Pucin straciŭ suviaź z realnaściu.