Spraŭdžvajucca najhoršyja prahnozy z nahody dziejańniaŭ Rasii ŭ dačynieńni da Litvy. Premjer Alhirdas Butkiavičus ŭ Siejmie padčas uradavaj hadziny pryznaŭ, što ŭ Kłajpiedskim porcie zatrymaŭsia hruz z charčovymi tavarami.
«Ja sustreŭsia z kiraŭnikom Litoŭskaj kanfiederacyi pramysłoŭcaŭ Robiertasam Darhisam, a taksama z kiraŭnikom Dziaržaŭnaj charčova-vieterynarnaj słužby. Tut niama čaho chavać. Užo z usich terminałaŭ Kłajpiedskaha porta niemahčyma ni ekspartavać, ni reekspartavać, ni impartavać. I voś prykład — kali Złučanyja Štaty Amieryki praz «chaładzilnik» Śmiełte pieravozili kurynyja nožki, to amierykanskaja kampanija atrymała ŭkazańnie: prośbu ekspartavać praź inšyja party, jakija nie naležać Litvie i niekatorym inšym krainam», — skazaŭ premjer.
Butkiavičus zajaviŭ žurnalistam, što Rasija aficyjna paviedamiła ab błakavańni pastavak praduktaŭ charčavańnia praź Litvu.
«Atrymany list u Kłajpiedskim terminale. Akramia taho, atrymanyja listy tymi kampanijami, jakija ekspartujuć pradukcyju praz partovyja terminały ŭ Rasiju. I ŭ tych listach havorycca, što ekspart ź Litvy, partovych terminałaŭ Kłajpiedskaha marskoha porta i, mahčyma, niekatorych inšych terminałaŭ u Rasiju niemahčymy. I ahučana prośba nakiravać reekspart, ekspart praduktaŭ charčavańnia praź inšyja party», — skazaŭ premjer -ministr.
Na pytańnie ab tym, jakija mohuć być nastupstvy padobnaj błakady, kiraŭnik urada pradstaviŭ nastupnyja ličby.
«Pakul što ab stratach my nie havorym, tamu što tolki siońnia atrymali hetuju infarmacyju. Raźlik moža być vielmi prosty. Za hod praz terminały Kłajpiedskaha porta reekspartujecca i ekspartujecca ŭ Rasiju bolš za 1 młn ton charčavańnia», — skazaŭ Butkiavičus.
