Što moža azmročyć nadychod viasny, dyk heta vaha, nabranaja za zimu. Z hetaj nahody na «Biełsacie» startavała «pieršaje biełaruskaje azdaraŭlalna-zabaŭlalnaje šou z elemientami bufanady, interaktyvu i lohkaj erotyki» z paetkaju Valarynaju Kustavaj i muzykam Paŭłam Arakielanam. A taksama z prafiesijnymi trenierami, lekarami i płastyčnymi chirurhami.
«Naša Niva» pahutaryła z hałoŭnymi hierojami prahramy pra novy dla Biełarusi farmat. My daviedalisia, što heta budzie amal realicišou, padčas jakoha Valaryna budzie imknucca skinuć ledź nie 50 kh!
Naša Niva: Valaryna, ci nie strašny taki ekshibicyjanizm i čamu ty na jaho pahadziłasia? 50 kiłahramaŭ — heta vielmi šmat!
Valaryna Kustava: U prahramie ja vydaju ŭsie svaje paramietry: uzrost, vahu, abjomy. Ja dumaju, takaja publičnaść matyvuje. Zachodžu niadaŭna ŭ kaviarniu na pracy, a ŭsie kalehi choram: «Ty što, biareš miasa? Tabie chiba možna miasa?!» Mnie možna! Ciapier, kali nas buduć bačyć hledačy, to navat šakaładku na vulicy nie źjasi — zapielenhujuć. Zrešty, šakaładku mnie taksama možna! Ja pierakananaja — ja vytrymaju. I ŭžo naprykancy hoda vy mianie nie paznajecie. U najlepšym sensie.
NN: Pavieł, jak stavišsia da ŭčynku Valaryny ździejśnić taki ekśpierymient?
Pavieł Arakielan: Z pavahaj. Ale publičnamu čałavieku nie treba bajacca ŭvahi, tamu bolš za ŭsie ja pavažaju jaje pracazdolnaść i metanakiravanaść.
NN: Napisana, što heta budzie šou z elemientami erotyki. Intryhuje, kaniečnie, ale čaho sapraŭdy čakać?
Valaryna: Abiacajem, što jana budzie. Bo ŭ našaj tvorčaj bryhadzie, aproč mianie, piaciora chłopcaŭ. Tamu ja ledź strymlivaju ich fantazii.
NN: Jak paŭstała ideja takoha šou?
Valaryna: My sustrakalisia z Pašam na supolnych vystupach, i ja bačyła, jak jon fajna vyhladaje. I adnojčy paprostu spytałasia, ci nie moh by jon paraić mnie treniera. I Paša prapanavaŭ sam zaniacca mnoj. Zaniatki prachodzili tak viesieła i cikava, što my vyrašyli padzialicca svaim dośviedam i ź inšymi. Tym bolš vyniki pačali źjaŭlacca adrazu.
NN: Čym vašaje šou budzie adroźnivacca ad typovych fitnesprahram?
Pavieł: Papieršaje, heta šou, pabudavanaje na humary i rohacie, hladzieć jaho budzie nie tolki karysna, ale i viesieła. Padruhoje, my robim jaho jak dla siabie, vykładajučysia na 100% i bolej.
Valaryna: Heta budzie pravilny emacyjny pasył na zdaroŭje. Nie prosta hadzina zaniatkaŭ ź sieryi «paŭtaraj za nami», a stylizacyja śviadomaści. Pasył u tym, što, žyvučy ŭ Biełarusi, treba być zdarovym i enierhičnym, kab dasiahnuć zadumanaha.
Taksama hledačoŭ čakajuć novyja rubryki i hości — biełaruskija znanyja spartoŭcy i lekary, a taksama my budziem pravodzić konkursy i kansultacyi.
NN: Moža, buduć jašče jakija-niebudź fiški?
Valaryna: Narešcie źjavicca prahrama, u jakoj buduć elemienty ŭsiaho taho, čaho tak brakavała na biełaruskim telebačańni. Heta i interaktyŭ z hledačami praz sacyjalnyja sietki, i humar, i intym, i zdarovy ład žyćcia. Usio, čaho tak nie staje ŭ chvoraj i depresiŭnaj biełaruskaj rečaisnaści.
NN: Ci sapraŭdy možna budzie schudnieć, hledziačy šou i padparadkoŭvajučysia tamu, što tam buduć raspaviadać?
Valaryna: Tak, kali prytrymlivacca paradaŭ pa charčavańni i zaniatkach, jakija my dajom ciaham prahramy. Ale nie prosta schudnieć, a stać zdarovym, mocnym i pryŭkrasnym. Kab vyžyć i žyć u Biełarusi.
Šou startavała 8 sakavika. Chudzieć, hledziačy zabaŭlalnaje šou, možna na sajcie «Biełsata» kožnuju subotu a 18.30.