Nichto nie budzie dapamahać Ukrainie, pakul jana sama nie pačnie abaraniacca ad rasiejskaj ahresii. Pra heta na pres-kanfierencyi zajaviŭ były kiraŭnik SBU Ihar Śmiaško.
Jon adznačyŭ, što Jeŭropa tolki ciapier pačała farmiravać ahulnuju palityku ŭ adnosinach da Ukrainy, i tamu spadziavacca, što ZŠA i Jeŭropa biez Ukrainy vyrašać krymskuju prablemu, nie varta.
U suviazi z hetym Śmiaško vykazaŭ mierkavańnie, što ciapier kamandavańnie Uzbrojenymi siłami Ukrainy nie adpaviadaje ŭzroŭniu pahrozy. Jon rastłumačyŭ, što v. a. ministra abarony Ihar Cieniuch nie maje ahulnavajskovaha vopytu pa kiraŭnictvie vajennymi apieracyjami.
Jak dokaz Śmiaško nazvaŭ toje, što Ukraina spaźniajecca z pryniaćciem rašeńniaŭ pa pierakryćci miežaŭ i nie zdoleła mabilizavać dastatkova kolkasny kantynhient ŭnutranych vojskaŭ dla błakavańnia paŭdniova-ŭschodnich miežaŭ Ukrainy.
Śmiaško ŭpeŭnieny, što na siońnia ŭsio zaležyć ad pryniaćcia žorstkich mier ukrainskim uradam, ad razhortvańnia abarony.
Jon ličyć, što ŭ kiraŭnictva krainy niama palityčnaj voli i ŭmieńnia ŭziać adkaznaść na siabie, choć sił va ŭkrainskaj armii dastatkova, kab arhanizavać abaronu dziaržavy.
Śmiaško prapanuje pryciahnuć da płanavańnia vajennych apieracyj adstaŭnych hienierałaŭ, jakija majuć vopyt kiraŭnictva značnymi vajskovymi złučeńniami jašče z savieckich časoŭ.
