Siońnia ŭ 08:00 pa kijeŭskim časie (09:00 pa Minsku) u Krymie pačaŭsia niepryznany śvietam refierendum ab samavyznačeńni, jaki pravodzicca pry vajennaj i palityčnaj padtrymcy Rasijskaj Fiederacyi.
U biuleteni ŭsiaho tolki dva pytańni na troch movach: rasijskaj, ukrainskaj i krymskatatarskaj.
1. Vy za ŭźjadnańnie Kryma z Rasijaj na pravach subjekta Rasijskaj Fiederacyi?
2. Vy za adnaŭleńnie dziejańnia Kanstytucyi Respubliki Krym 1992 i za status Kryma jak častki Ukrainy?
Pakolki Kanstytucyjaj Ukrainy nie praduhledžana praviadzieńnie miascovych refierendumaŭ i z ulikam taho faktu, što refierendum u Krymie staŭ mahčymym dziakujučy ŭvarvańniu rasijskich vojskaŭ, suśvietnaja hramadskaść, za vyklučeńniem Rasii, ličyć jaho nielehitymnym.
U pryvatnaści, refierendum byŭ pryznany nielehitymnym ŭkrainskim Kanstytucyjnym sudom, Vieniecyjanskaj kamisijaj, ES i ZŠA. 15 sakavika na razhlad Rady Biaśpieki AAN była vyniesiena rezalucyja, jakaja praduhledžvaje abviaścić refierendum u Krymie «takim, što nie maje siły» i zaklikać usie krainy nie pryznavać jaho vyniki, adnak Rasija zabłakavała jaje, skarystaŭšysia pravam vieta.
Suprać refierendumu ŭ Krymie aktyŭna vystupajuć tolki krymskija tatary.
