Reuters.com
Pavodle aficyjnych vynikaŭ hałasavańnia na «refierendumie» ab statusie AR Krym, za dałučeńnie da Rasijskaj Fiederacyi vykazalisia amal 97% udzielnikaŭ hałasavańnia.
Pra heta zajaviŭ kiraŭnik krymskaj kamisii pa praviadzieńni refierendumu Michaił Małyšaŭ, pišuć rasijskija infarmacyjnyja ahienctvy.
Małyšaŭ adznačyŭ, što suprać prahałasavali mienš za 3% udzielnikaŭ refierendumu, jašče 1% biuleteniaŭ niesapraŭdny.
Jaŭka vybarcaŭ, paviedamlajecca, «skłała» 81,37%, u Sievastopali 89,51%.
16 sakavika ŭ Krymie prajšoŭ niepryznany śvietam refierendum ab samavyznačeńni, jaki pravodziŭsia va ŭmovach vajennaj akupacyi paŭvostrava siłami Rasijskaj Fiederacyi. Na refierendum byli dapuščanyja tolki tyja mižnarožnyja naziralniki, jakija tym ci inšym čynam źviazanyja z Rasijaj.
U biuleteni było ŭsiaho tolki dva pytańni.
1. Vy za ŭźjadnańnie Kryma z Rasijaj na pravach subjekta Rasijskaj Fiederacyi?
2. Vy za adnaŭleńnie dziejańnia Kanstytucyi Respubliki Krym 1992 i za status Kryma jak častki Ukrainy?
Pakolki Kanstytucyjaj Ukrainy nie praduhledžana praviadzieńnie miascovych refierendumaŭ i z ulikam taho faktu, što refierendum u Krymie staŭ mahčymym dziakujučy prysutnaści rasijskich vojskaŭ, suśvietnaja hramadskaść, za vyklučeńniem Rasii, ličyć jaho nielehitymnym.
U pryvatnaści, refierendum byŭ pryznany nielehitymnym ŭkrainskim Kanstytucyjnym sudom, Vieniecyjanskaj kamisijaj, ES i ZŠA. 15 sakavika na razhlad Rady Biaśpieki AAN była vyniesiena rezalucyja, jakaja praduhledžvaje abviaścić refierendum u Krymie «takim, što nie maje siły» i zaklikać usie krainy nie pryznavać jaho vyniki, adnak Rasija zabłakavała jaje, skarystaŭšysia pravam vieta.
Suprać refierendumu ŭ Krymie aktyŭna vystupali tolki krymskija tatary. Pavodle Bi-Bi-Si, 95% krymskich tataraŭ bajkatavali refierendum.
Kali ŭ 1938 hodzie Hitler pravodziŭ anšlus Aŭstryi, na tahačasnym «refierendumie» «za» prahałasavali bolš za 99% vybarcaŭ.
