U lutym składskija zapasy pramysłovych pradpryjemstvaŭ Biełarusi praciahvali pavialičvacca. Na 1 sakavika ŭzrovień składskich zapasaŭ pieravysiŭ 80% ad siaredniamiesiačnaha abjomu vytvorčaści.
Na 1 sakavika abjom składskich zapasaŭ pradpryjemstvaŭ składaŭ 32,58 trłn. rubloŭ i dasiahnuŭ 80,8% ad siaredniamiesiačnaha abjomu pramvytvorčaści (na 1 lutaha — 78,2%). Za studzień—luty abjom składskich zapasaŭ na pradpryjemstvach krainy vyras u hrašovym vyražeńni na 4,6 trłn. rubloŭ (amal na 480 młn. dołaraŭ u ekvivalencie pa siaredniamiesiačnym kursie za ŭkazany pieryjad).
Rost składskich zapasaŭ u studzieni—lutym abumoŭleny šmat u čym ich pavieličeńniem u arhanizacyjach, padviedamasnych Minpramu. Składskija zapasy hetych pradpryjemstvaŭ vyraśli z pačatku hoda bolš jak na 2,3 trłn. rubloŭ.
Varta adznačyć, što ŭ lutym rost składskich zapasaŭ adbyŭsia na pradpryjemstvach va ŭsich rehijonach krainy, za vyklučeńniem Minskaj vobłaści.
Tak, u Minsku składskija zapasy na 1 sakavika dasiahnuli 120% da miesiačnaha abjomu pramvytvorčaści (na 1 lutaha — 117,3%, na 1 studzienia — 98,5%), u Mahiloŭskaj — 98% (94,7 i 76%), u Bresckaj — 81,5% (79,4 i 76,6%), u Hrodzienskaj — 78,7% (77,6 i 68,4%), u Homielskaj — 43,6% (39,2 i 37,3%), u Viciebskaj — 36,7% (35,1 i 32,4%).
Nahadajem, što zhodna ź lutaŭskim apytańniem pramysłovych pradpryjemstvaŭ, praviedzienym Navukova-daśledčym ekanamičnym instytutam Minekanomiki, mnohija arhanizacyi ličyli ŭzrovień składskich zapasaŭ zališnim.
Tak, u lutym 2014 hoda ŭzrovień zapasaŭ hatovaj pradukcyi 43% apytanych kiraŭnikoŭ pradpryjemstvaŭ acanili jak «zališni», što na 8 punktaŭ vyšej za studzieńskuju adznaku, 47% paličyli «narmalnym» i tolki 7% adkazali «nižej za normu».
Varta adznačyć, što ŭ lutym 40% kiraŭnikoŭ pradpryjemstvaŭ kanstatavali, što popyt na ich pradukcyju ŭ pačatku hetaha hoda źniziŭsia.
Tolki 13% adznačyli pavieličeńnie popytu. Na pradpryjemstvach ličać, što na dynamiku ahulnaha abjomu popytu ŭ bolšaj stupieni paŭpłyvała źmianieńnie ŭnutranaha popytu. Dola adkazaŭ ab pavieličeńni popytu na ŭnutranym rynku skłała ŭsiaho 12%, ab źnižeńni — 44%.
Jak paviedamlałasia raniej, z čaćviortaha kvartała 2013 hoda Nacyjanalny bank uzmacniŭ žorstkaść hrašova-kredytnaj palityki, što vykazałasia ŭ abmiežavańni abjomaŭ kredytavańnia. Kamiercyjnym bankam było rekamiendavana abmiežavać pryrost kredytavańnia ekanomiki 1% u miesiac, a ŭ pieršym kvartale 2014 hoda Nacbank abviaściŭ pra źnižeńnie rekamiendavanaha paramietra da 0,7% u miesiac. Pavodle mierkavańnia ekśpiertaŭ, abmiežavańnie abjomaŭ kredytavańnia mahło stać pryčynaj źmianšeńnia ŭnutranaha popytu na pramysłovuju pradukcyju ŭ pačatku hetaha hoda.
