Biełaruś zacikaŭlena ŭ «stabilnych palityčnych, ekanamičnych, humanitarnych adnosinach z susiednimi brackimi krainami», zajaviŭ BiełaPAN pres-sakratar biełaruskaha MZS Dźmitryj Mirončyk na prośbu prakamientavać situacyju va Ukrainie i Krymie.
«Hatovy prykłaści ŭsie mahčymyja z našaha boku namahańni dla taho, kab viarnuć adnosiny pamiž Ukrainaj i Rasijaj u narmalnaje rečyšča, — skazaŭ Mirončyk. — My zaŭsiody havaryli, što treba znachodzić varyjanty dla ŭrehulavańnia pytańniaŭ dypłamatyčnymi srodkami praz dyjałoh i nie dapuskać siłavoha supraćstajańnia ni z adnaho boku».
Na pytańnie, ci zastajecca raniejšaj pazicyja Biełarusi ab prychilnaści terytaryjalnaj cełasnaści Ukrainy, jakuju abviaściŭ ministr zamiežnych spraŭ Uładzimir Makiej, pres-sakratar MZS adkazaŭ: «Vy pa-raniejšamu možacie vykarystoŭvać u poŭnym abjomie zajavy, zroblenyja kiraŭnictvam Ministerstva zamiežnych spraŭ pa ŭkrainskaj situacyi apošnim časam. MZS nie dezavujuje ŭsie zroblenyja raniej vykazvańni».
Nahadajem, 3 sakavika ŭ intervju ahienctvu BNS Makiej, u pryvatnaści, zajaviŭ: «My zacikaŭleny ŭ tym, kab Ukraina zastałasia stabilnaj, terytaryjalna cełasnaj, niezaležnaj dziaržavaj, kab tam nie było taho, što adbyvajecca siońnia. Ja nazvaŭ heta trahiedyjaj».
