nasha.lv
Afierysty atrymali ad žadajučych stać madelami intymnyja fotazdymki, i pačali šantažavać dziaŭčat. Za 500 dołaraŭ jany abiacali nikomu ich nie pakazvać.
Kryminalnaja historyja pačałasia ŭ śniežni minułaha hoda. Dvoje chłopcoŭ spačatku chacieli paviesialicca, a dumka padzarabić źjavilisia paźniej, jak pryznajucca zatrymanyja. Jany ŭ sacyjalnaj sietcy «UKantakcie» raźmiaścili abjavy ab pošuku dziaŭčat dla raboty fotamadelami. Patencyjalnyja kandydatki adhuknulisia vielmi chutka, paviedamlaje HUUS Minharvykankama.
Dla dalejšych znosinaŭ z budučymi fotamadelami maładyja ludzi padrychtavalisia zahadzia: stvaryli dźvie staronki z vydumanymi źviestkami. Ad imia Aleny Ivanovaj i Andreja Dubnieviča chłopcy stali aktyŭna adkazvać achvotnicam patrapić u šou-biznes.
Padčas virtualnych znosinaŭ spašukalnicaŭ paprasili dasłać try foty ŭ kupalniku abo ŭ bialiźnie i try foty ŭ aholenym vyhladzie.
U jakaści achviar maładyja ludzi vybrali dźviuch dziaŭčat i tanalnaść pierapiski źmianiłasia. Im padrabiazna rastłumačyli, što ich intymnyja foty mohuć być razasłanyja siabram i znajomym. Pry hetym prapanoŭvałasia vyjście ź situacyi: za 500 dołaraŭ maładyja ludzi abiacali, što ŭsie foty ŭ styli niu buduć źniščanyja.
Takim pavarotam padziej niaspraŭdžanyja fotamadeli byli šakavanyja: spačatku prasili pakinuć ich u spakoi. Kali ž šantažysty stali bolš nastojlivymi, nakiravalisia ŭ milicyju.
Padčas praviadzieńnia kompleksu vyšukovych mierapryjemstvaŭ supracoŭniki Partyzanskaha RUUS ustanavili i zatrymali abodvuch šantažystaŭ. Ciapier raspačataja kryminalnaja sprava pa padazreńni ŭ vymahalnictvie, učynienym hrupaj asob. Staronki Aleny Ivanovaj i Andreja Dubnieviča vydalenyja z sacyjalnaj sietki, kampramietujučyja fotazdymki źniščany.
Razam z hetym u milicyi miarkujuć, što ŭ hetaj historyi mohuć być i inšyja paciarpiełyja.
