Niekatoryja ŭ sacyjalnych sietkach nazyvajuć jaho «pravakataram» za zaklik supraciŭlacca rasijskaj ekspansii. Kažuć, što «byłych daradcaŭ Pucina nie byvaje». Adnak dziela spraviadlivaści, jašče 10 kastryčnika minułaha hoda Iłaryjonaŭ papiaredziŭ praź intervju «Ukrainskaj praŭdzie» ab płanach svajho byłoha bosa — «Pucin ličyć, što častka Ukrainy pavinnaja naležać Rasii».
Kali i jość padstavy vykazvać pretenzii Iłaryjonavu, to jakraz ideałahična zahartavanym rasijcam. Tamu što Iłaryjonaŭ, naprykład, nie pieršy hod žyvie ŭ Vašynhtonie, pracujučy staršym navukovym supracoŭnikam prestyžnaha pryvatnaha analityčnaha centra — Instytuta Katona, jaki vyznaje ekanamičny libieralizm. Akramia taho, Iłaryjonaŭ byŭ vybrany dla prahramy, pryśviečanaj vierchavienstvu prava i demakratyi, stvoranaj u Stenfardskim univiersitecie Majkłam Makfołam.
I jašče trochi bijahrafii: Andrej Iłaryjonaŭ byŭ daradcam Uładzimira Pucina z 2000 pa 2005 h. — rasijskim «šerpaj» na sustrečach «vialikaj vaśmiorki». Svoj sychod z pasady patłumačyŭ tym, što «kraina pierastała być palityčna svabodnaj».
Što čakaje dalej Ukrainu — u novym intervju Iłaryjonava «Ukrainskaj praŭdzie».
— Vy doŭha razmaŭlali z Pucinym asabista, viedajecie jaho jak čałavieka. Što Pucin adčuvaje ŭ hety momant? Heta revanš, złość, žadańnie adpomścić ci prosta chałodny prahmatyčny raźlik i racyjanalnyja intaresy Rasii?
— Ja ŭziaŭ sabie za praviła nie kamientavać asabistyja charaktarystyki Uładzimira Pucina. Što da siońniašnich padziej — nie tolki tak zvanaha «refierendumu» ŭ Krymie 16 sakavika, ale ŭvohule ŭsiaho pachodu suprać Ukrainy — to siońnia, ci zaŭtra, ci 21 sakavika jon nie skončycca.
Čamu nazirajecca ahresija suprać Ukrainy? Jość meta i płan pa napadzie na Ukrainu, jaki byŭ padrychtavany šmat hadoŭ tamu.
Šeść hadoŭ tamu jon byŭ apublikavany, u tym liku samim Uładzimiram Pucinym na samicie NATO ŭ Buchareście ŭ 2008 hodzie, kali Pucin skazaŭ pra toje, što Ukraina nie adbyłasia jak dziaržava, što jana zajmaje vialikuju kolkaść spradviečna ruskich ziemlaŭ. Z čaho vynikała, što rana ci pozna pytańnie viartańnia spradviečna ruskich ziemlaŭ — ci, jak ciapier pryniata kazać, «uźjadnańnia raźjadnanaha naroda» — stanie ŭ paradak dnia Pucina.
Havorka išła tolki pra toje, kali mienavita heta adbudziecca. Revalucyja i źviaržeńnie raniejšaha režymu byli paličanyja zručnym momantam dla pačatku hetaj prahramy. Tam jość šmat roznych punktaŭ, jakija vykładzienyja ŭ pazicyi rasijskaha Ministerstva zamiežnych spravaŭ u dačynieńni da abłaściej Ukrainy: heta Krym, heta paŭdniovy ŭschod, nu i, viadoma, źmiena ŭłady ŭ Kijevie. Plus dadatkovyja rečy — padrychtoŭka novaj Kanstytucyi, jakuju pišuć u Kramli, razzbrajeńnie ŭkrainskaha naroda, likvidacyja Majdana i hetak dalej.
— Na vašu dumku, kančatkovaja meta — heta dałučeńnie ŭsioj Ukrainy? Abo maryjanietkavy režym va Ukrainie jak kvaziniezaležnaj dziaržavie?
— I toje, i druhoje. Zychodziačy z pryncypaŭ novaj Kanstytucyi, padrychtavanaj u Kramli, va Ukrainie pavinnaja być praviedzienaja tak zvanaja fiederalizacyi, u vyniku jakoj u roznych rehijonaŭ Ukrainy musić źjavicca prava na źniešnija suviazi. De-fakta heta pieravod rehijonaŭ Ukrainy ŭ status aŭtanomij z pravam paŭtaryć tuju samuju praceduru, śviedkami jakoj my tolki što stali ŭ Krymie.
— Zdajecca, navat amierykanskija štaty nie majuć prava na asobnuju zamiežnuju palityku.
— Navošta kazać pra inšyja krainy? My havorym pra dakumient, jaki prapanavany ŭkrainskaj uładzie. Dzie, pavodle peŭnaha raskładu, toj ci inšy rehijon Ukrainy, a mahčyma, adrazu niekalki rehijonaŭ buduć abviaščać tyja ci inšyja statuty i adychodzić da Rasii. I dzie, viadoma, utrymlivajecca patrabavańnie źmieny ŭrada ŭ Kijevie ŭ adpaviednaści z tym bačańniem, jakoje jość u Kramla. U hetych ža patrabavańniach ukazana, što Ukraina ni ŭ jakim vypadku nie stanovicca siabram NATO. Patrabavańnie niejtralitetu prapisvajecca nie adzin, a navat dva razy ŭ hetym dakumiencie. Patrabujecca poŭnaje razzbrajeńnie ŭkrainskaha naroda, patrabujecca źniasieńnie Majdana i, mabyć, niedapuščeńnie jaho. I, urešcie, hety dakumient pavinnyja harantavać Rasija, Jeŭrapiejski sajuz i ZŠA, paśla čaho ŭsio heta pavinna być zaćvierdžana Radaj Biaśpieki AAN.
Vy pytalisia, što heta — poŭnaja akupacyja Ukrainy ci maryjanietkavy režym va Ukrainie jak kvaziniezaležnaj dziaržavie. Heta aznačaje adnačasova i adrazańnie kavałkaŭ Ukrainy, i farmavańnie na astatniaj častcy maryjanietkavaha režymu, stvoranaha pa praviłach, pa Kanstytucyi, jakaja napisana ŭ Kramli i z uradam, sfarmavanym pa patrabavańni Kramla.
— Siońnia ŭ Kramla jość favaryty va ŭkrainskaj palitycy?
— Pa-mojmu, ni ŭ koha ni tut, ni ŭ Rasii niama z nahody hetaha sumnievaŭ…
— Raskažycie nam.
— A vy nie bačyli intervju Uładzimira Pucina rasijskim žurnalistam? Taki infarmavany čałaviek, jak Alaksiej Vieniadziktaŭ źviarnuŭ uvahu na toje, jakija roznyja leksičnyja srodki vykarystaŭ Uładzimir Pucin dla apisańnia ciapierašnich uładaŭ u Kijevie («nielehitymny, kryminalny režym, jaki ździejśniŭ antykanstytucyjny dziaržaŭny pieravarot, jaki zachapiŭ uładu ŭ Kijevie») i «Julija Uładzimiraŭna Cimašenka, ź jakoj my zaŭsiody dobra pracavali, u nas jość uzajemnaje razumieńnie».
— Ale Cimašenka staić za Jacaniukom i Turčynavym. Tady čamu Pucin nazyvaje ich uładu kryminalnaj, kali za joj staić Cimašenka?
— Spadarynia Cimašenka nie źjaŭlajecca kiraŭnikom ciapierašniaj ułady, prynamsi naminalna. I, jak mnie zdajecca, ciapierašniaja ŭłada vielmi pazityŭna pastaviłasia da hetych patrabavańniaŭ Rasii. Tamu što nie dalej jak u subotu było apublikavanaje patrabavańnie ab razzbrajeńni ŭkrainskich hramadzian. Heta adno z patrabavańniaŭ, jakoje zafiksavanaje ŭ dakumiencie, padrychtavanym Rasijaj.
— Ale razzbrajeńnie hramadzian — heta razumnaje patrabavańnie i samich ukraincaŭ.
— Heta nie razumnaje patrabavańnie. Razumnaje patrabavańnie dla zabieśpiačeńnia svabody i niezaležnaści krainy — heta poŭnaje ŭzbrajeńnie naroda. U Šviejcaryi lehalizavanaje vałodańnie zbrojaj, pryčym nie tolki strałkovaj. U ZŠA dosyć vialikaja kolkaść adzinak ahniastrelnaj zbroi, jakaja zabiaśpiečvaje hramadzianskija i palityčnyja pravy amierykancaŭ. Kab volny čałaviek nie staŭ rabom, jość adzin z samych pierakanaŭčych arhumientaŭ, jaki byŭ vypracavany čałaviectvam ciaham stahodździaŭ, — heta svabodnaje vałodańnie zbrojaj. Ničoha lepšaha čałaviectva nie prydumała.
— Davajcie vierniemsia da łohiki padziej. Hety płan uvarvańnia na terytoryju Ukrainy isnavaŭ daŭno, ale ŭcioki Janukoviča ŭvachodzili ŭ płan ci nie?
— Ja mocna sumniavajusia, što byli zapłanavanyja takija raptoŭnyja ŭcioki Janukoviča z Kijeva. Pucin, kožny raz kažučy pra heta, byŭ mocna razzłavany. I padrychtavanyja napracoŭki daviałosia realizavać značna chutčej, čym heta było zapłanavana.
A ŭ toj samy momant, kali spadar Abama ŭ telefonnaj razmovie sa spadarom Pucinym zajaviŭ, što jon nie źbirajecca źviartacca da jakich-niebudź dziejańniaŭ z udziełam uzbrojenych sił ZŠA, to tym samym jon padpisaŭ Miunchienskuju zmovu — 2014. U pierakładzie z dypłamatyčnaj movy na zvyčajnuju hetyja słovy Abamy aznačajuć: «Zabiraj Krym». Paśla hetaj razmovy ŭ noč z 6 na 7 sakavika praces zachopu Kryma i de-fakta jaho anieksii istotna paskoryŭsia.
— Pad miemarandumam harantavańnia terytaryjalnaj cełasnaści Ukrainy byli podpisy ZŠA i Vialikabrytanii. Heta chiba nie sihnał usiamu śvietu, što možna raźvivać jadziernuju zbroju, tamu što harantyi Amieryki ničoha nie vartyja?
— Całkam jasna, što zaraz sotnia dziaržaŭ surjozna zadumajecca ab tym, u jakija terminy im nieadkładna treba stvaryć jadziernuju zbroju ŭ jakaści niepaźbiežnaha srodku, jaka tolki i moža harantavać terytaryjalnuju cełasnaść hetych dziaržavaŭ. Bo harantyi ni Vialikabrytanii, ni ZŠA nie kaštujuć toj papiery, na jakoj jany napisanyja. Ukraina ŭ dadzienym vypadku jarki prykład, na jaki hladziać usie.
— Dyk Ukrainie taksama varta adnavić jadzierny patencyjał?
— Heta ž damova, u jakoj z adnaho boku jość Ukraina, jakaja ŭziała abaviazańnie admovicca ad jadziernaj zbroi, a jość haranty, jakija nie zabiaśpiečyli hetaha. Z punktu hledžańnia mižnarodnaha prava vidać, što hetaja damova pierastała mieć pravavyja nastupstvy. I zaraz užo sprava Ukrainy, prytrymlivacca hetaha dakumienta abo rabić niejkija vysnovy.
— Vy naŭprost ahitujecie za adnaŭleńnie jadziernaha patencyjału Ukrainy?
— Heta nijakaja nie ahitacyja. Heta naturalny łahičny vynik taho, što hety dakumient pierastaŭ isnavać.
— A da hetaha vy vystupali ŭ Kijeva-Mahilanskaj akademii i naŭprost zaklikali: «Kali Ukraina raźličvaje na vajennuju dapamohu ZŠA, jana pavinnaja pačać vajavać».
— Vy skažajecie maju pazicyju. Kali kraina sapraŭdy choča abaranić svaju niezaležnaść i terytaryjalnuju cełasnaść, to niama inšaha sposabu heta zrabić, akramia jak supraciŭlacca ahresaru. Supraciŭ moža mieć roznyja vidy. Kali kraina nie supraciŭlajecca, a spadziajecca na inšych dziadźkoŭ, jana robić vialikuju histaryčnuju pamyłku. Nie było ŭ historyi vypadkaŭ, kab inšyja krainy stali b abaraniać achviaru ahresii, kali sama achviara ahresii nie supraciŭlajecca.
— A jak supraciŭlacca?
— U nas jość jak minimum dva histaryčnyja prykłady. Čechasłavakija ŭ 1938 pajšła na pryniaćcie ŭmovaŭ Miunchienskaj damovy, zhodna ź jakoj čatyry krainy — Vialikabrytanija, Francyja, Hiermanija i Italija — harantavali novyja miežy Čechasłavakii.
Vynik my dobra viedajem. Spačatku zabrali Sudeckuju vobłaść, a zatym praz paŭhoda hiermanskija vojski ŭvajšli ŭ Prahu — u histaryčnuju stalicu tysiačahadovaha hiermanskaha rejcha — i na miescy niezaležnaj Čechasłavakii ŭtvaryŭsia pratektarat Bahiemii i Maravii. A Słavakija abviaściła svaju niezaležnaść. Heta pieršy varyjant — kali achviara ahresii nie supraciŭlajecca.
Jość inšy varyjant z toj ža epochi.
30 listapada 1939 h. savieckija vojski pierajšli saviecka-finskuju miažu. I choć suadnosiny sił pamiž ahresaram i achviaraj ahresii byli niesupastaŭnyja — 200 miljonaŭ suprać 3 miljonaŭ — Finlandyja supraciŭlałasia, u vyniku čaho straciła častku terytoryi. Tym nie mienš, abaraniła svaju niezaležnaść, dziaržaŭny suvierenitet.
Anałahičnaja historyja adbyłasia 6 hadoŭ tamu padčas rasijskaj ahresii suprać Hruzii. Heta było ciažkaje vyprabavańnie. Hruzinskija ŭłady vyrašyli supraciŭlacca. Tak, jany stracili terytoryju — Paŭdniovuju Asieciju i Abchaziju. 20% hruzinskaj terytoryi akupavana rasijskimi vojskami. Ale Hruzija zachavała niezaležnaść i dziaržaŭny suvierenitet.
— Heta značyć, kali pravodzić anałohii, u nas jość dva šlachi: albo my supraciŭlajemsia, stračvajem Krym, ale zachoŭvajem astatniuju častku krainy, albo nie zmahajemsia i Ukraina moža pierastać isnavać jak kraina?
— Supraciŭ nosić raznastajny charaktar. Ale z momantu pačatku akupacyi Kryma ni adna z mahčymych mier nie była raspačataja. I nie vidać, kab ukrainskija ŭłady źbiralisia iści pa hetym šlachu. Ukraina maje vybar — pajści pa šlachu Čechasłavakii abo pa šlachu Finlandyi i Hruzii…
— Straciŭšy žyćci svaich suhramadzian?
— Tak, i žyćci svaich suhramadzian. Heta taja ž situacyja, što i z Majdanam. Majdan stajaŭ dva miesiacy, byli napady, jakija pryviali da śmierci. Ale zachodnija krainy nie akazali nijakaj realnaj dapamohi. Ich sankcyi suprać režymu Janukoviča pačalisia tolki tady, kali zahinuli ludzi i narod Ukrainy dakazaŭ, što jon supraciŭlajecca.
Heta zakon žyćcia, zakon dypłamatyi. Nichto nie dapamahaje achviary ahresii — vonkavaj abo ŭnutranaj — kali sama achviara nie supraciŭlajecca.
A što da achviaraŭ, to kali vy dumajecie, što nie było strat u Čechasłavakii, vy hłyboka pamylajeciesia. Karnyja apieracyi suprać čechasłavackaha nasielnictva, jakoje akazałasia pad kantrolem hiermanskich vojskaŭ, pravodzilisia ŭvieś čas akupacyi pratektaratu Bahiemii i Maravii. Tamu straty i čałaviečyja, i terytaryjalnyja niepaźbiežnyja ŭ abodvuch vypadkach. Pytańnie zaklučajecca nie ŭ tym, ci stračvać nasielnictva, a ŭ tym, vybiraje ŭkrainskaje hramadstva supraciŭ abo zdaču terytoryi.
— Ale ž i łohiku ciapierašniaj ułady možna zrazumieć. Jany dumajuć tak: «My bačyli Hruziju, jakaja vajavała i straciła svaich suhramadzian, a akupacyja ŭsio roŭna adbyłasia. Tamu my nie budziem vajavać. Chaj budzie akupacyja, ale my choć zachavajem žyćci ludziej. A nas, Turčynava, Jacaniuka i inšych, potym nie buduć vinavacić za toje, što my adpravili ŭkrainskich synoŭ na śmierć». Plus jany raźličvajuć, što Zachad nie dazvolić ruskim vojskam ruchacca ŭ hłyb macieryka.
— Mahčyma, taki raźlik i jość. Ale jon nie paćviardžajecca histaryčnym vopytam. I ja nikoli nie kazaŭ, što nieabchodna adkryvać ahoń.
— Ale jak tady supraciŭlacca? Padryvać hazapravody, što pierapampoŭvajuć haz z Rasii ŭ Jeŭropu, jak prapanujuć niekatoryja radykały?
— Nu, heta vy ŭ radykałaŭ spytajcie. Pieršaje, što nieabchodna było rabić, — heta pravodzić usieahulnuju mabilizacyju. Nieabchodna było adrazu ž pierakryvać suchaputnuju ŭkrainska-rasijskuju miažu, kab nie dapuścić prytoku tak zvanych «pucinskich turystaŭ». Kali b heta było zroblena, nie zahinuli b ludzi ŭ Daniecku i Charkavie.
Kali adbyŭsia zachop budynka Viarchoŭnaj Rady ŭ Simfieropali, pieršaj ža reakcyjaj pavinien byŭ być uzdym pa bajavoj tryvozie ŭsich ukrainskich voinskich častak, raźmieščanych u Krymie.
Naturalna, voinskija častki vychodziać z kazarmaŭ, biaruć pad kantrol asnoŭnyja infrastrukturnyja abjekty — aeradromy, čyhunačnyja stancyi, party, paromnyja pierapravy, pierašyjek, najvažniejšyja administracyjnyja budynki, vuzły suviazi. Pa pierymietry administracyjnaj miažy Sievastopala ŭstaloŭvajucca błokposty ŭkrainskich uzbrojenych sił, i jany praviarajuć, chto vyjazdžaje ź Sievastopala i kudy nakiroŭvajecca. Heta robicca adrazu i nieadkładna.
— Što rabić siońnia?
— Pierš za ŭsio treba mieć uładu, dla jakoj niezaležnaść i terytaryjalnaja cełasnaść Ukrainy — nie pusty huk. Kali hetaha niama, usie astatnija pytańni biessensoŭna vyrašać.
— Jakoj vy bačycie rolu tataraŭ va ŭsioj hetaj historyi? Moža Krym stać Čačnioj?
— Pakul Krym pieratvarajecca ŭ niejkaje padabienstva Abchazii ci Paŭdniovaj Asiecii, u vajenny płacdarm. Što da tataraŭ, to ja dumaju, kažučy pa-navukovamu, što na Krymskim paŭvostravie projduć istotnyja źmieny etničnaha składu. Heta niepaźbiežna. Pahladzicie vopyt Abchazii — etničnyja čystki, likvidacyja hrekaŭ, bałharaŭ, estoncaŭ, radykalnaje skaračeńnie inšych etničnych hrup. U Paŭdniovaj Asiecii etničnyja ankłavy Vialiki Liachvi i Mały Liachvi, nasielenyja hruzinami, pierastali isnavać jak kłas. I spadar Kakojty ŭračysta zajaviŭ: «My tam vyčyścili ŭsio».
Jakuju formu nabudzie źmiena etničnaha składu nasielnictva Krymskaha paŭvostrava, ja skazać nie mahu. Ale jasna, što dla zabieśpiačeńnia pracazdolnaści novaj bujnoj vajennaj bazy ŭ Krymie niepatrebnyja dva miljony žycharoŭ. Taksama jak niepatrebnyja tyja, chto ŭžo nieadnarazova zajaŭlaŭ ab svajoj niełajalnaści da novaj ułady na paŭvostravie. Pierš za ŭsio heta krymskija tatary.
— Ale heta maje advarotny bok. Tatary atrymali svaje ziemli zusim niadaŭna, jany buduć supraciŭlacca, mohuć pačacca terakty. Niaŭžo budzie tak prosta vycisnuć ich z hetaj ziamli?
— Davajcie ja vam nahadaju. U dačynieńni da krymskich tataraŭ pravodziłasia jak minimum try hienacydy: u kancy 18 stahodździa, paśla anieksii Krymskaha chanstva Rasijskaj impieryjaj; druhi hienacyd byŭ praviedzieny paśla zaviaršeńnia Krymskaj vajny. I, narešcie, treci hienacyd byŭ ažyćcioŭleny 18 maja 1944 hoda, kali krymska-tatarski narod byŭ departavany z Kryma ŭ Kazachstan i Siaredniuju Aziju.
Bajusia, što krymska-tatarski narod ciapier kinuty. Jany ŭ stanie zakładnikaŭ. Ja nie chaču pradkazvać, što tam adbudziecca. Ale na terytoryi Rasii jość niekatoryja rajony, u dačynieńni da jakich rasijskaja armija i śpiecsłužby mnohija hady zajmalisia vyrašeńniem, jak vy kažacie, «terarystyčnaj pahrozy».
— U vypadku dałučeńnia Kryma da Rasii ci zmoža Maskva chutka adnavić elektryfikacyju, vodazabieśpiačeńnie, jakija ciapier zabiaśpiečvajucca z macierykovaj častki Ukrainy?
— Dla pačatku ja b chacieŭ źviarnuć uvahu na toje, što kanał Dniepr—Krym zabiaśpiečvaje vadoj pierš za ŭsio stepavy, raŭninny Krym, dzie asnoŭnymi etničnymi hrupami źjaŭlajucca ŭkraincy i krymskija tatary. Tamu lubyja pieraboi z vodazabieśpiačeńniem pryviaduć tolki da skaračeńnia etničnych hrup, jakija buduć niełajalnyja da novaha režymu. A pytańnie elektryfikacyi vyrašajecca pastaŭkami elektryčnaści z susiedniaha Krasnadarskaha kraju.
— Ci mohuć akupacyja Kryma, vajna suprać Ukrainy i Majdan pryvieści da chvalavańniaŭ i źviaržeńnia dziejnaha režymu ŭ Rasii?
— Davajcie havaryć prafiesijna. Vy nie razumiejecie pryrody palityčnaha režymu ŭ Rasii. Heta sapraŭdy vielmi rodnasny režym režymu spadara Janukoviča, ale pa stupieni žorstkaści jany niesupastaŭnyja. Pucinski režym u kłasifikacyi palityčnych režymaŭ nazyvajecca «žorstki aŭtarytarny palityčny režym». Da prykładu, režym Bašara Asada ŭ Siryi taksama žorstki aŭtarytarny. I my viedajem, što tam užo try hady idzie hramadzianskaja vajna. U krainie zahinuła bolš za 110 ci 120 tysiač čałaviek, i režym pakul jašče nie pavaliŭsia.
— Ci moža Krym paśla sychodu pucinskaha režymu viarnucca ŭ skład Ukrainy?
— Ja ŭžo nie pieršy raz čuju, što Krym abo paŭdniovy ŭschod zastanucca ŭ składzie Ukrainy dziakujučy dziejańniam ZŠA, harantaŭ Budapiešckaha miemaranduma, padziej u Rasii i tak dalej. Ja vam dakładna harantuju: kali vy spadziejaciesia tolki na heta, Krym nikoli nie vierniecca Ukrainie. Nie tolki Krym. Ukraina nie zmoža abaranić svaju niezaležnaść.
— Ci možna z vašych słovaŭ zrabić vysnovu pra toje, što adziny sposab dyjałohu z Pucinym — heta mova zbroi?
— A vy možacie pryvieści inšyja prykłady, jakija b dakazvali, što z dapamohaj zajavaŭ, vykazvańnia zaniepakojenaści i takich strašnych rečaŭ, jak «my nie pajedziem na samit vaśmiorki ŭ Sočy» možna ŭhavaryć tanki abo sistemy supraćpavietranaj abarony S-300 pakinuć Krym? Vy kali-niebudź bačyli takija prykłady?
— Ale ž sankcyi ŭrešcie padkasili režym Viktara Janukoviča: jaho pačali vyrakacca jaho ž paplečniki. Čamu heta ž nie moža zdarycca z Pucinym?
— Mnie zdajecca, hałoŭnaj pryčynaj pieramohi revalucyi va Ukrainie byŭ Majdan i supraciŭ ukraincaŭ. Nijakija zajavy Zachadu, nijakija piačeńki, jakija razdavali raznastajnyja dypłamaty, nie adyhrali adpaviednaj roli.
Tolki supraciŭ ukraincaŭ, tolki ich rašučaść, kali jany skazali «my adsiul nie sydziem, pakul nie sydzie Janukovič», — heta toj jasny prykład, jaki byŭ prademanstravany ŭ vas na vačach, na vačach ukrainskaj ułady.
Jašče raz kažu — heta vašaja sprava, a nie maja, što rabić u hetym vypadku. Rašeńni, jakija byli, a dakładniej nie byli pryniatyja ciaham apošnich 18 dzion, adnaznačna pakazvajuć, što ciapierašnija ŭkrainskija ŭłady abrali varyjant niesupracivu. Nu što ž, heta vybar zakonnych uładaŭ Ukrainy. Ale my sa svajho boku abaviazanyja skazać, da čaho pryviadzie vybar hetaha varyjantu. I zaklikajem nie mieć iluzij nakont taho, što z dapamohaj zajavaŭ abo navat sankcyj rasijskija vojski pakinuć terytoryju Kryma. Nie, hetaha nie adbudziecca.
