Ź Mienska pryjechali dva aŭtobusy pilihrymaŭ.
Ranicaj u Bazyljanskim i Daminikanskim saborach Vilni prajšła imša pamiaci Kastusia Kalinoŭskaha, jakaja zakončyłasia vykanańniem himnu «Mahutny Boža» i šeściem ź bieł-čyrvona-biełymi ściahami pa vilenskich vułkach.
Aprača biełaruskich ściahoŭ, było šmat žoŭta-sinich ukrainskich — na znak salidarnaści z Ukrainaj, jakaja ciapier zmahajecca za svaju volu i cełasnaść.
Na Łukišskaj płoščy manifiestantaŭ čakali litoŭcy, u ich liku znanyja palityki Vitaŭtas Łandśbierhis i Emanuelis Zinhierys.
Mitynh adkryŭ adzin z najstarejšych biełarusaŭ Vilni Chviedar Niuńka, jakomu ŭžo 85. Mienavita jon razam z Rucham «Za svabodu» i rucham Salidarnaści «Razam» arhanizavaŭ uračystaści ŭ Vilni.
Spadar Niuńka paviedamiŭ, što ŭrad Litvy prysłuchaŭsia da prośbaŭ biełarusaŭ i pastanaviŭ padčas rekanstrukcyi Łukiskaj płoščy zachavać kryž i plitu na miescy straty Kalinoŭskaha.
Alaksandr Milinkievič u svaim vystupie skazaŭ: «Kalinoŭski — apostał niezaležnaści i svabody Biełarusi, adna z samych vialikich postaciaŭ biełaruskaha panteonu. Jon byŭ prarokam, kali kazaŭ, što tolki tady biełaruski narod budzie volny, kali maskala nad im nie budzie. Za 150 hadoŭ impierskaja palityka Rasiei nie źmianiłasia, što pakazvajuć padziei va Ŭkrainie.
Vitaŭtas Łandsberhis skazaŭ, što jon dobra razumieje biełaruskuju movu inšych vystupoŭcaŭ, i choć sam havaryć na jej nie moža, zatoje ŭmieŭ jahony baćka, jaki dekłamavaŭ «Dudku biełaruskuju».
«Kalinoŭski — śviaty čałaviek, hieroj Litvy j Biełarusi. Nakolki jon darahi biełarusam, nastolki darahi j litoŭcam… Ciapier najbolšaja padtrymka patrebnaja ŭkrainskamu narodu. Ukraina pavinna vytrymać nacisk impieryi, suprać jakoj zmahaŭsia Kastuś Kalinoŭski. I pieramoha Ŭkrainy budzie dabrom dla Biełarusi», — skazaŭ Łandsberhis.
Pradstaŭnik kijeŭskaha Majdanu, małady chłopiec Astap Vakaluk zaznačyŭ: «Michaił Žyźnieŭski — hieroj nie tolki Ukrainy j Biełarusi, bo jon zmahaŭsia i zahinuŭ za volu ŭ 26 hadoŭ, jak i Kastuś Kalinoŭski na hetym placy. My ŭ Kijevie dobra razumiejem, što Ukraina stanie volnaj tolki tady, kali ŭpaduć režymy ŭ Maskvie i Miensku».
Ušanavańnie pamiaci Kalinoŭskaha zaviaršyłasia kancertam-rekvijemam u aktavaj zale Jeŭrapiejskaha humanitarnaha ŭniviersiteta.
