Nacyjanalny konkurs kino ŭpieršyniu projdzie ŭ 2014 hodzie ŭ miežach čarhovaha Minskaha mižnarodnaha kinafiestyvalu (MMKF) «Listapad», paviedamili ŭ pres-centry fiestyvalu. 

XXI Minski mižnarodny kinafiestyval «Listapad» adbudziecca 7—14 listapada. Arhanizataram kinaforumu vystupaje Centr vizualnych i vykanalnickich mastactvaŭ «ART Karparejšn», zasnavalnikami — Ministerstva kultury, Minharvykankam pry sadziejničańni Biełteleradyjokampanii, Nacyjanalnaj kinastudyi «Biełaruśfilm» i Biełaruskaha sajuza kiniematahrafistaŭ. 

Arhanizatary kinafiestyvalu padkreślivajuć, što Nacyjanalny konkurs kino zaklikany «źviarnuć uvahu na tvorčyja zdolnaści biełaruskich aŭtaraŭ», siarod jakich «šmat adoranych ludziej». Jany pryvodziać u prykład takija stužki, jak «Zdymać na paražeńnie» Kiryła Nonha, «Što joj padabajecca» Ivana Maślukova, «Nieba ŭsiudy adnolkavaje» Andreja Myčko, «Saletra № 7» Siarhieja Saviankova i Paŭła Kaścieviča, «Adzinota» Dźmitryja Dziadka, «Mašy, Sašy» Lubovi Žuromskoj i raboty mnohich inšych režysioraŭ, jakija «paćviardžajuć važnaść pošuku i padtrymki biełaruskich entuzijastaŭ». 

«Dyrekcyja fiestyvalu maje namier źbirać pracy suajčyńnikaŭ niezaležna ad krainy ich pražyvańnia. Važna prademanstravać realnyja talenty biełarusaŭ, zdolnych stvarać aryhinalnyja idei ŭ kino ŭłasnymi siłami», — havorycca ŭ paviedamleńni pres-centra «Listapada». 

Jak adznačajecca, da ŭdziełu ŭ Nacyjanalnym konkursie kino prymajucca jak poŭnamietražnyja, tak i karotkamietražnyja kinastužki dakumientalnaha, ihravoha i animacyjnaha charaktaru, jakija buduć padzieleny na adpaviednyja naminacyi. Hałoŭnaja ŭmova pryjomu pracy da ŭdziełu ŭ konkursie — film pavinien być stvorany na praciahu apošnich dvuch hadoŭ vyklučna biełaruskimi aŭtarami ŭ samoj Biełarusi ci za jaje miežami. 

Dla ŭdziełu ŭ konkursie biełaruskim aŭtaram nieabchodna nakiravać na adras dyrekcyi kinafiestyvalu zapoŭnieny filmahrafičny list na kožny pradstaŭleny film (spasyłka na formu zapaŭnieńnia apublikavana na sajcie listapad.com); poŭny tekst filma ŭ aryhinale i na ruskaj, anhlijskaj ci francuzskaj movach; dysk z zapisam filma; rekłamny rolik i kadry ź filma; sinopsis, rekłamnyja materyjały, pres-materyjały; materyjały dla katałoha, u tym liku źviestki pra stvaralnikaŭ filma, fatahrafii (uklučajučy fota režysiora), słajdy filmaŭ. 

Zajaŭki na ŭdzieł prymajucca da 22 vieraśnia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?