U mianie šmat niedachopaŭ, jak i ŭ bolšaści ludziej, ale na adzin usio ž bolš, čym u inšych. Ja — radyjoamatar. Voś užo kala paŭstahodździa.
Radyjoamatary — uvasableńnie sapraŭdnaha internacyjanalizmu. Ludzi ŭsich krain, usich ras, usich vieravyznańniaŭ kamunikujuć pamiž saboj, niezaležna ad palityčnaj kanjunktury. Jany mohuć pahavaryć ź inžynieram z Aŭstralii, karaleŭskaj asobaj ź Blizkaha Uschodu ci amierykanskimi sienatarami. U efiry niama ranhaŭ, pasad, zvanńniaŭ, niama ničoha, što padzialaje ludziej u žyćci. I tamu finansavyja i, tym bolš, palityčnyja prablemy zaŭsiody zastavalisia za miažoj razmovaŭ. I heta nie tolki abumoŭlena ŭmovami mižnarodnaha statuta radyjoamatarstva, ale i narmalnymi čałaviečymi adnosinami pamiž roznymi ludźmi, jakich abjadnoŭvaje ŭ žyćci tolki adno — amatarskaje radyjo.
Radyjoamatary kaliści byli samymi vietlivymi ludźmi ŭ śviecie. Słovy «dziakuj», «kali łaska», «budźcie łaskavyja» — zaŭsiody ŭ leksicy narmalnaha amatara. I jašče — 73. U radyjoamatarskim kodzie hetyja ličby aznačajuć hłybokuju pavahu i najlepšyja pažadańni. Hetyja słovy dahetul zastajucca hałoŭnymi ŭ radyjoamataraŭ usiaho śvietu. Dakładniej skazać, u pieravažnaj bolšaści. Akramia častki ŭkrainskich i rasijskich radyjoamataraŭ. Nie sakret, što apošnija padziei va Ukrainie raskałoli hramadstva ŭ postsavieckich respublikach. I hety raskoł niečakana dla ŭsich «nasielnikaŭ efiru» zdaryŭsia i tut. Častata na sarakamietrovym dyjapazonie 7.050 MHc stała ŭ apošnija paŭhoda pahałoskaj. Tut sychodziacca štodnia, kruhłyja sutki napralot najbolš zaŭziatyja prychilniki abodvuch bakoŭ — Rasii i Ukrainy. Pieravažajuć, viadoma, rasiejcy. Što tut robicca, ciažka rastłumačyć čałavieku, jaki nikoli nie słuchaŭ amatarskaha efiru. Skažu prosta: verchał u paraŭnańni z hetaj ahidnaściu — prosta dziciačy sad. Nichto nikoha nie słuchaje, usie radyjostancyi pracujuć tolki na pieradaču, bolš mahutnyja stancyi pierakryvajuć słabyja, chtości prosta stavić pieraškody, chtości ŭklučaje muzyku, i ŭsie havorać, havorać, havorać… I nad usim hetym panuje vialiki i mahutny ruski mat, zamianiajučy ŭdzielnikam usie astatnija dovady i arhumienty. Pryznajusia, što choć ja i vyras u krai i va ŭmovach, dzie łajanka časam zamianiała samyja zvyčajnyja paniaćci, ale takoha matu ja ŭ žyćci nie čuŭ nikoli. U samaje sumnaje ŭ hetym — hetyja ludzi nazyvajuć i ličać siabie radyjoamatarami!
U apošni čas źjaviŭsia i novy srodak dla dokazu svajoj słušnaści.
U efiry pačynajuć hučać frahmienty televizijnych i radyjopieradač, tranślacyi repartažaŭ ź internetu, bałazie sučasnaja technika dazvalaje. Kali mat tolki kvietački, jakija havorać tolki pra nizkuju kulturu i adsutnaść samapavahi ŭ ludziej, to takija tranślacyi parušajuć asnovy radyjoamatarstva, u kodeksie jakoha vyrazna prapisana, što ŭ amatarskim efiry nie mohuć tranślavacca lubyja kamiercyjnyja i dziaržaŭnyja prahramy. Na toje jano i amatarskaje. I heta praŭda, dla čaho tady isnuje vielizarnaja sietka telestancyj i prahram. Jany ž zajmajucca toj ža samaj palemikaj i prapahandaj roznych punktaŭ hledžańnia, ale sa značna bolšym razmacham.
Karaciej kažučy, jak u kampjutar, u amatarski efir prakraŭsia niebiaśpiečny virus, ź jakim nieabchodna zmahacca. Da honaru biełaruskich radyjoamataraŭ, jany, u asnoŭnym, zastajucca ŭ baku ad usieahulnaha verchału chamstva i hrubaści ŭ efiry, časam navat spyniajuć sproby rasijskich stancyj uciahnuć ich u palemiku, sam nie raz byŭ śviedkam hetaha. Sumna i baluča nazirać za takoj dehradacyjaj amatarskaha efiru. Bo kožny raz kožny radyjoamatar, vychodziačy ŭ efir, prezientuje nie tolki siabie, ale i ŭsiu krainu, pra jakuju ŭ śviecie miarkujuć nie tolki pa palitykach, ale i pa radyjoamatarach. 73!
