Sudovaja kalehija pa kryminalnych spravach Bresckaha abłasnoha suda 10 kastryčnika vyniesła pryhavor 34-hadovamu niepracujučamu žycharu Bresta, jaki zabiŭ z asablivaj žorstkaściu baćku-piensijaniera.
Jak paviedamiŭ načalnik adździeła prakuratury Bresckaj vobłaści Alena Leščanka, jakaja padtrymlivała dziaržaŭnaje abvinavačańnie pa spravie, viečaram 22 červienia mužčyna, jaki žyvie ŭ adnoj kvatery z baćkami, źbiŭ 60-hadovaha baćku. Jon nanios jamu kułakami i nahami nie mienš jak 18 udaraŭ, u tym liku nie mienš jak 12 — u hałavu. Paśla hetaha syn pajšoŭ da siabie ŭ pakoj hladzieć televizar. Maci, jakaja viarnułasia damoŭ, znajšła ŭ spalni miortvaha muža, jaki pamior ad adkrytaj čerapna-mazhavoj traŭmy.
Pavodle słoŭ abvinavačvanaha, kali jon raśpivaŭ vino razam z baćkam, toj nazvaŭ jaho niaŭdačnikam. Paličyŭšy heta abrazaj, syn źbiŭ baćku.
Siastra abvinavačvanaha raskazała, što raniej brat, znachodziačysia ŭ stanie ałkaholnaha apjanieńnia, taksama źbivaŭ baćku i maci.
Sudovaja kalehija pa kryminalnych spravach Bresckaha abłasnoha suda pryznała mužčynu vinavatym u naŭmysnym supraćpraŭnym pazbaŭleńni žyćcia čałavieka, učynienym z asablivaj žorstkaściu (p. 6 č. 2 art. 139 KK), i pryhavaryła da 14 hadoŭ pazbaŭleńnia voli z adbyvańniem pakarańnia ŭ papraŭčaj kałonii ŭzmocnienaha režymu. U sudovym pasiadžeńni jon zajaviŭ, što straciŭ nad saboj kantrol, zabivać baćku nie chacieŭ.
Pryhavor jašče nie nabyŭ zakonnuju moc i moža być abskardžany. Sudzimaści raniej mužčyna nie mieŭ.
