Udzieł Piatra Parašenki ŭ minskim samicie SND nie paŭpłyvaŭ by na situacyju va Ukrainie, zajaviŭ žurnalistam 10 kastryčnika ŭ Minsku kiraŭnik MZS RF Siarhiej Łaŭroŭ.
Jon adznačyŭ, što krainy SND nie zajmajucca ŭrehulavańniem kanfliktu va Ukrainie. «Hetym zajmajucca pradstaŭniki Kijeva i paŭdniovaha ŭschodu ŭ miežach minskaha pracesu», — skazaŭ jon. Akramia taho, dadaŭ rasijski čynoŭnik, Ukraina była pradstaŭlena na samicie pasłom Michaiłam Ježalem.
Jak paviedamlałasia raniej, na siońniašnim pasiadžeńni Savieta kiraŭnikoŭ dziaržaŭ SND prezident Uźbiekistana Isłam Karymaŭ vykazaŭ niezadavalnieńnie nakont adsutnaści Piatra Parašenki. «Stvarajecca ŭražańnie, što jon razdvojvajecca i nie moža adkazać sabie, na karyść vychad z SND ci nie, — ličyć Karymaŭ. — Kali b jon vystupiŭ siońnia tut, to heta stvaryła b dla nas jašče bolšuju jasnaść z vyrašeńniem ukrainskaj prablemy. Ale, na žal, hetaha nie zdaryłasia».
«Chto tvar u tvar apošnim časam sustrakaŭsia z Parašenkam?» — zapytaŭ Karymaŭ u prysutnych. Pry hetym, zaŭvažyŭ jon, prezident Ukrainy «naviedaŭ mnohija krainy Jeŭropy».
Varta adznačyć, što napiaredadni samitu, 9 kastryčnika, adbyłasia telefonnaja hutarka pamiž Alaksandram Łukašenkam i Piatrom Parašenkam. Ukrainski prezident paprasiŭ prabačeńnia za svoj niaŭdzieł u minskim samicie i prapanavaŭ Łukašenku sustrecca najbližejšym časam va Ukrainie. Parašenka paprasiŭ surazmoŭcu davieści da ŭdzielnikaŭ samitu pazicyju Ukrainy ŭ suviazi z padziejami ŭ Łuhanskaj i Danieckaj abłaściach.
