Eks-kandydat u prezidenty Biełarusi Aleś Michalevič, jaki atrymaŭ palityčny prytułak u Čechii, adnoŭleny ŭ statusie člena Partyi BNF. Adpaviednaje rašeńnie pryniataje delehatami źjezda arhanizacyi, jaki prachodzić 11 kastryčnika ŭ Minsku.
Michalevič źviarnuŭsia z prośbaj adnavić jaho ŭ partyi ŭ śpiecyjalnym liście da delehataŭ źjezda. Jon adznačyŭ, što nie moža zaraz viarnucca ŭ Biełaruś z-za pieraśledu śpiecsłužbaŭ, ale hatovy padtrymlivać partyju i płacić členskija ŭznosy.
Niahledziačy na toje što staršynia partyi Alaksiej Janukievič byŭ suprać razhladu zajavy Michaleviča na źjeździe, «bo jon nie zasłuhoŭvaje adnaŭleńnia ŭ partyi», źjezd bolšaściu hałasoŭ prahałasavaŭ za zadavalnieńnie prośby palityka.
Michalevič byŭ vyklučany z Partyi BNF 14 červienia 2008 hoda rašeńniem sojma, źjaŭlajučysia na toj momant namieśnikam staršyni arhanizacyi.
Na partyjnym sajcie ŭ suviazi z hetym byŭ raźmieščany kamientaryj kiraŭnika partyi Lavona Barščeŭskaha. «Na žal, častka ludziej nie zrazumieła, što partyjnaja praca — heta nie hulnia, što partyja — nie kantora klijentaŭ, a arhanizacyja, jakaja realizuje sumiesna vyznačanyja palityčnyja mety, — napisaŭ Barščeŭski. — Daviałosia pryniać niaprostaje, ale absalutna nieabchodnaje rašeńnie. Takoje rašeńnie vyśpiavała daŭno. Michalevič admoviŭsia vykonvać užo pryniatyja rašeńni sojma partyi, pierajšoŭ da publikacyi źnievažalnych, pierachodnych na asoby vykazvańniaŭ na adras inšych kiraŭnikoŭ Partyi BNF».
