Minfin RF aceńvaje straty rasijskaha biudžetu ad admieny mytnych vyklučeńniaŭ pamiž Rasijaj i Biełaruśsiu ŭ $700 młn u 2015 hodzie, paviedamiŭ žurnalistam 15 kastryčnika ŭ Maskvie namieśnik ministra finansaŭ Siarhiej Šatałaŭ. 

«Našy dadatkovyja straty na ŭzroŭni dzieści $700 młn», — skazaŭ jon.

Ministr finansaŭ Anton Siłuanaŭ havaryŭ raniej, što admova ad pieraliku Biełaruśsiu ŭ Rasiju ekspartnych pošlin na naftapradukty za 2015 hod užo častkova ŭličana ŭ prajekcie biudžetu na nastupny hod, astatniaja ž častka, pavodle jaho słoŭ, niaznačnaja i nie pryviadzie da źmianieńnia paramietraŭ biudžetu. 

Šatałaŭ udakładniŭ, što ahulnaja suma pošlin, jakija zastanucca ŭ biudžecie Biełarusi ŭ 2015 hodzie, — $1,5 młrd. «Palityčnyja rašeńni pryniatyja, zastałosia dalej zbałansavać biudžet», — skazaŭ namieśnik ministra. Pavodle jaho słoŭ, mižuradavaje pahadnieńnie ab admienie mytnych vyklučeńniaŭ pamiž dźviuma krainami, chutčej za ŭsio, budzie padpisana da kanca kastryčnika. 

Jak paviedamlałasia, u vieraśni stała viadoma, što rasijski ŭrad unios u Dziarždumu zakonaprajekt, jaki płanuje realizavać u nastupnym hodzie tak zvany padatkovy manieŭr (rezkaje źnižeńnie ekspartnych pošlin na naftu i naftapradukty i adnačasova z hetym značnaje pavyšeńnie padatku na zdabyču karysnych vykapniaŭ). 

29 vieraśnia Alaksandr Łukašenka zajaviŭ, što zapłanavany Rasijaj padatkovy manieŭr u naftavaj halinie moža pryvieści da značnych strat dla Biełarusi i stvaryć prablemy ŭ funkcyjanavańni Jeŭrazijskaha ekanamičnaha sajuza. Pavodle acenak biełaruskich uład, straty Biełarusi z-za praviadzieńnia Rasijaj padatkovaha manieŭru mahli skłaści kala $1 młrd. 

Na minułym tydni stała viadoma, što Biełaruś nastojvaje na kampiensacyi strat, vyklikanych padatkovym manieŭram u naftavaj halinie Rasii. U pryvatnaści, biełaruski bok prapanavaŭ poŭnaściu zaličvać u biełaruski biudžet vyvaznyja pošliny na naftapradukty, jakija naležać Rasii da 2017 hoda. 

7 kastryčnika pa vynikach sustrečy Michaiła Miaśnikoviča i Dźmitryja Miadźviedzieva stała viadoma, što rasijski bok pahadziŭsia kampiensavać straty, vyklikanyja padatkovym manieŭram. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?