na fota były pasoł Polskaha sojma Alaksandr Stahanovič
U sučasnaj Biełarusi isnuje patreba padtrymki i raźvićcia nieprydumanaj litaratury, jaje aŭtaraŭ i vydavieckaha pracesu. Dla spryjańnia vyrašeńniu hetych zadač zasnoŭvajecca Premija imia Alaksandra i Maryi Stahanovičaŭ.
U 2011 h. u vydaviectvie «Limaryus» była zapačatkavanaja knižnaja sieryja «Biełaruskaja miemuarnaja biblijateka», hałoŭnaj idejaj jakoj - publikacyja uspaminaŭ biełarusaŭ i pra Biełaruś, što źjaŭlajucca adnym z žanraŭ nieprydumanaj litaratury.
Pieršaj knihaj, jakaja pabačyła śviet u hetaj sieryi, stali «Uspaminy pasła» emihranta Alaksandra Stahanoviča (1890—1988).
U chutkim časie była apublikavanaja i kniha jahonaj žonki Maryi Stahanovič (1898—1995) «Maje ŭspaminy». U 2015 h. spaŭniajecca 125 hadoŭ ad naradžeńnia Alaksandra Stahanoviča i 20 hadoŭ ad śmierci Maryi. Ich dačka, viadomaja mastačka, što žyvie ŭ Ńju-Jorku, Tamara Stahanovič-Kolba, žadajučy ŭšanavać pamiać pra baćkoŭ i padtrymać nieprydumanuju litaraturu, vyrašyła zasnavać premiju ichniaha imia za knihu ŭ hetaj halinie.
Premija maje być uručana ŭ 2015 h. za knihi, nadrukavanyja ŭ Biełarusi na biełaruskaj movie ŭ pieryjad 2011—2014 hh.
Partniorami ŭ arhanizacyi konkursu i ŭručeńni premii vystupajuć: Biełaruski instytut navuki i mastactva, HA «Sajuz biełaruskich piśmieńnikaŭ», MHA «Zhurtavańnie biełarusaŭ śvietu «Baćkaŭščyna», vydaviectva «Limaryus».
Na premiju mohuć być vyłučany knihi, napisanyja ŭ halinie nieprydumanaj litaratury nastupnych žanraŭ:
— Miemuary, uspaminy, dziońniki, epistalarnaja spadčyna (nie tolki ŭłasnyja, ale i publikacyi čužych),
— Bijahrafii,
— Traviełohi (padarožnyja natatki),
— Dakumientalnaja proza.
Troch pieramožcaŭ konkursu vyznačyć kampietentnaje žury ŭ składzie:
— staršynia siekcyi nieprydumanaj litaratury ŭ Sajuzie biełaruskich piśmieńnikaŭ, siabra Upravy ZBS «Baćkaŭščyna», hałoŭny redaktar almanacha «Zapisy BINiM», kandydat histaryčnych navuk Natalla Hardzijenka,
— siabra Upravy ZBS «Baćkaŭščyna», zahadčyk adździełu staradrukaŭ i redkich vydańniaŭ Prezidenckaj biblijateki Respubliki Biełaruś Valer Hierasimaŭ,
— siabra Sajuzu biełaruskich piśmieńnikaŭ, kandydat fiłałahičnych navuk Viktar Žybul,
— dyrektar Biełaruskaha dziaržaŭnaha archiva-muzieja litaratury i mastactva Hanna Zapartyka,
— litaraturaznaŭca, siabra Biełaruskaha PEN-centra, staršy navukovy supracoŭnik Centra daśledavańniaŭ biełaruskaj kultury, movy i litaratury NANB, kandydat fiłałahičnych navuk Hanna Kiślicyna,
— litaraturaznaŭca, siabra Biełaruskaha PEN-centra, supracoŭnik redakcyi časopisa «Maładość» Cichan Čarniakievič,
— dyrektar vydaviectva «Limaryus» Maryna Šybko.
Ahulny pamier premii budzie padzieleny pamiž tryma pieramožcami, kožny ź jakich atrymaje taksama dypłom i pamiatny miedal.
Pravam naminavańnia na premiju imia Alaksandra i Maryi Stahanovičaŭ vałodajuć jak aŭtary ci vydaŭcy, tak i členy žury konkursu.
Pry vyłučeńni knihi na premiju treba da 19 studzienia 2015 h. pieradać u arhkamitet papiarovy i/ci elektronny varyjant teksta. Papiarovyja vydańni treba pradstaŭlać u Sajuz biełaruskich piśmieńnikaŭ pa adrasie: 220012, Minsk, vuł. Kuźmy Čornaha, 31–906. Elektronnyja viersii vydańniaŭ možna dasyłać na adras: [email protected]. Pry pieradačy ci dasyłcy knih na premiju treba rabić admysłovuju paznaku «Premija A. i M. Stahanovičaŭ».
Telefon dla daviedak: 8 (017) 200-80-91.
Imiony pieramožcaŭ buduć abvieščany ŭ krasaviku 2015 h.
