16 kastryčnika ŭ Minsku prachodzić forum «Palitviaźni Biełarusi».
Na im abmiarkoŭvajucca mahčymyja zachady biełaruskich i zamiežnych struktur dla najchutčejšaha vyzvaleńnia palitviaźniaŭ, pryciahnieńnia ŭvahi hramadskaści da temy palitźniavolenych, što, na dumku arhanizataraŭ, asabliva značna napiaredadni čarhovych prezidenckich vybaraŭ.
U arhkamitet forumu ŭvachodziać pradstaŭniki Partyi BNF, AHP, BCHD, hramadskich arhanizacyj Ruch «Za Svabodu», «Małady front», «Alternatyva», «Jeŭrapiejskaja Biełaruś», «Razam», pravaabarončaj hrupy «Za Volu» i kampanii «Havary praŭdu».
«Apošnim časam vostraja dla Biełarusi tema palitviaźniaŭ čamuści adyšła na druhi płan, — adznačyŭ pradstaŭnik BCHD Pavieł Sieviaryniec. — Jeŭrapiejskija palityki paśla Ukrainy sustrakajucca z Łukašenkam, viaduć ź im pieramovy, zabyŭšy pra toje, što papiaredniaj ŭmovaj dyjałohu było vyzvaleńnie palitviaźniaŭ. Biełaruskaje hramadstva zabyvajecca na hetuju temu, i hałoŭnaja zadača forumu — na ŭvieś hołas skazać, što ŭ Biełarusi jość palitviaźni, jany zaraz cierpiać i pakutujuć, da niekatorych ź ich prymianiajucca katavańni. Bolš za toje, u Biełarusi ź`iaŭlajucca novyja palitviaźni, jak, naprykład, Juryj Rubcoŭ. Jeŭrapiejskim palitykam treba nahadać, što dyjałoh z Łukašenkam pavodle ŭsich pastanoŭ jeŭrapiejskich instytutaŭ musić vieścisia paśla vyzvaleńnia i reabilitacyi palityčnych źniavolenych».
Pavodle słoŭ palityka, akramia taho jość jašče šmat ludziej, asudžanych za ekanamičnyja złačynstvy, u jakich praźmiernyja pakarańni i jakija nasamreč siadziać pa palityčnych pryčynach. «Tamu heta sprava nie tolki siami albo vaśmi čałaviek, heta ahulnacyjanalnaja prablema, — ličyć Sieviaryniec. — Praz kožnaha z palitviaźniaŭ režym ustaloŭvaje bar`ier strachu, i biełarusy, hledziačy na tych, chto za svaje pierakanańni hady pravodzić u turmie, bajacca vyjaŭlać svaju pazicyju, bajacca dziejničać. Na heta i raźličana toje, što palitviaźni zastajucca ŭ turmie».
