Biełaruś maje namier pašyryć uzajemadziejańnie z Afrykanskim sajuzam. Ab hetym paviedamiŭ siońnia na bryfinhu načalnik upraŭleńnia infarmacyi — pres-sakratar MZS Biełarusi Dźmitryj Mirončyk.
Damoŭlenaść ab raźvićci supracoŭnictva dasiahnuta ŭ čas vizitu ŭ Efiopiju biełaruskaj delehacyi na čale z namieśnikam ministra zamiežnych spraŭ Valancinam Rybakovym. U pryvatnaści, adbyłasia sustreča namieśnika kiraŭnika źniešniepalityčnaha viedamstva sa staršynioj kamisii Afrykanskaha sajuza Nkasazanaj Dłamini-Zuma.
Staršynia kamisii Afrykanskaha sajuza paćvierdziła zacikaŭlenaść hetaj rehijanalnaj arhanizacyi ŭ raźvićci supracoŭnictva ź Biełaruśsiu ŭ śfierach ekanomiki, navuki i technałohij, adukacyi i sielskaj haspadarki, inšych halinach. Dasiahnuta damoŭlenaść ab aktyvizacyi raboty pa vypracoŭcy kankretnych napramkaŭ supracoŭnictva Biełarusi z kamisijaj Afrykanskaha sajuza. Baki damovilisia taksama pačać padrychtoŭku pratakoła ab supracoŭnictvie pamiž Biełaruśsiu i kamisijaj, u jaki budzie zakładzieny ałharytm i instrumientaryj uzajemadziejańnia.
Akramia taho, prajšła sustreča biełaruskaj delehacyi z kiraŭnictvam dziaržaŭnaj karparacyi MIETIES. Na pierahavorach abmierkavany pierśpiektyvy stvareńnia ŭ Efiopii zboračnych vytvorčaściej biełaruskaj sielskahaspadarčaj, aŭtamabilnaj i darožna-budaŭničaj techniki. Dasiahnuta damoŭlenaść ab paskareńni padrychtoŭki da padpisańnia pakieta dakumientaŭ, nieabchodnaha dla adnaŭleńnia raboty zboračnaj vytvorčaści biełaruskich traktaroŭ na bazie kampanii Adama Agricultural Machinery Industry.-
