17 kastryčnika ŭ Kamitecie sałdackich maci horada Budzionaŭska Staŭrapolskaha kraju «Maci Prikumja» prajšoŭ pieratrus. Adnačasova kiraŭnicy arhanizacyi Ludmile Bahacienkavaj było vystaŭlenaje abvinavačvańnie pa art. 159 KK RF (machlarstva). 73-hadovaja pravaabaronca była zatrymanaja i źmieščanaja ŭ SIZA. Da paniadziełka ź joj nie zmoža źviazacca navat advakat.
Pravaabaroncy adnaznačna rasceńvajuć zatrymańnie i źmiaščeńnie Ludmiły Bahacienkavaj u SIZA jak akt zastrašvańnia ŭ suviazi ź jaje dziejnaściu.
Bahacienkava mnohija hady aktyŭna abaraniaje vajennasłužačych, vykryvajučy fakty biesčałaviečnaha abychodžańnia i katavańniaŭ sałdataŭ terminovaj słužby. Apošnija miesiacy jana rasśledavała abstaviny hibieli rasijskich vajskoŭcaŭ na Ukrainie ŭ lipieni-žniŭni 2014 hoda. Pravaabaronca kansultavała kantraktnikaŭ, jak im dziejničać, kab ich niezakonna nie adpravili ŭ Ukrainu.
U žniŭni Bahacienkava pieradała ŭ Radu pry Prezidencie Rasii pa raźvićci hramadzianskaj supolnaści i pravach čałavieka źviestki ab zahinułych 9 i 11 žniŭnia 2014 hoda nibyta «ŭ rajonie vajskovaha palihona ŭ Rastoŭskaj vobłaści» dzieviaci rasiejskich vajskoŭcaŭ, jakija prachodzili vajennuju słužbu pa kantrakcie ŭ 18 motastrałkovaj bryhadzie (v/č 27777).
