Piać z pałovaj hadzin biełaruski prezident vioŭ hutarku z rasijskimi žurnalistami. Na hety raz było paraŭnalna mała tradycyjnych pytańniaŭ u styli «Alaksandr Ryhoravič, parajcie, jak vychavać syna?» I «Jak vam udajecca zachoŭvać takuju formu?», Ale šmat ŭkrainskaj tematyki. Pryčym kali apošniaje było pradkazalna, to ahulnaja tanalnaść pres-kanfierencyi dla mnohich stała siurpryzam.
Zvyčajna rasijskich žurnalistaŭ źbirajuć, kab raspavieści pra siabroŭstva Biełarusi ź ich rehijonami, nieparušnaje słavianskaje braterstva i kavarny Zachad, nasupierak jakomu hetaje braterstva budzie žyć zaŭždy.
Ale na pres-kanfierencyi 17 kastryčnika kancentracyja paprokaŭ, krytyki i kalučaściaŭ ŭ adras Rasiei była niebyvałaj.
Davajcie zahinać palcy. Pa-pieršaje, Alaksandr Łukašenka paśla dobraha dziasiatka adkazaŭ na pytańni pra Majdan i Krym za apošnija paŭhoda kančatkova adtačyŭ svaju pazicyju. Takim čynam, Majdan — heta, viadoma, drenna, antykanstytucyjna i naohuł im kiravali z-za miažy. Ale voś tolki vinavatym — hałoŭnym i adzinym (!) — čarhovaj ŭkrainskaj revalucyi biełaruski prezident nazvaŭ svajho byłoha ŭkrainskaha kalehu Viktara Janukoviča, jakoha ciapier ścieraže Maskva.
Dalej — bolš. Alaksandr Łukašenka ciapier adnaznačny: Krym zabrali niezakonna.
Tak, Ukraina sama padstaviłasia, ale terytaryjalnaja cełasnaść vyšej za ŭsio. Bo jadziernuju zbroju Biełaruś z Ukrainaj mienavita pad harantyi cełasnaści addavali 20 hadoŭ tamu, nahadaŭ Łukašenka, dadaŭšy, što heta samaje hałoŭnaje, pra što jon škaduje za hady svajho prezidenctva. Ci baimsia my padobnaj pahrozy z uschodu? Nie! — zajaŭviŭ kiraŭnik dziaržavy i pažartavaŭ, što heta Rasieja pavinna chvalavacca za Bransk i Smalensk, jakija kaliści nam naležali.
Raniej na pramoje pytańnie ab pryznańni Kryma rasijskaj terytoryjaj prezident adkazvaŭ: «De-fakta pryznajom». Siońnia: «Nie treba nas dziaŭbać, jak z Abchazijaj».
I tut ža Alaksandr Łukašenka raspaviadaje doŭhuju historyju pra toje, jak rasijskija kiraŭniki (da jakich jon źviartajecca ŭ svajoj pramovie na «ty») admoviłasia padstavić plačo Biełarusi, kali taja paprasiła kampiensacyju za pryznańnie Paŭdniovaj Asiecii i Abchazii šeść hadoŭ tamu.
Vajna na ŭschodzie Ukrainy. Viadoma, treba spyniać krovapralićcie, kaža Łukašenka.
Ale voś ni DNR, ni ŁNR biez rasijskaj padtrymki ŭžo b nie było.
Tezis, viadoma, biassprečny, dy voś tolki niečakana śmieły, uličvajučy, što naša vajennaja sajuźnica svoj udzieł u kanflikcie admaŭlaje.
Łukašenka raspavioŭ haściam, što Sajuznaja dziaržava rasčaroŭvaje jaho hramadzian i ŭ hetym vinavata mienavita rasijskaje kiraŭnictva, jakoje ŭ novym sajuzie nie choča zdymać dla Biełarusi naftavyja vyklučeńni, dy jašče i narović zabrać nam naležnaje padatkovymi manieŭrami.
Pavodle słoŭ Łukašenki, takija pavodziny dzie-nidzie nazyvajecca «impierskimi ambicyjami». Znoŭ zastajecca tolki pahadzicca i praciahnuć ździŭlacca niečakanaj ščyraści samaha viernaha sajuźnika Maskvy.
Rasija, vusnami kiraŭnika dziaržavy, nie maje racyi i ŭ sprečcy z Małdovaj. Maŭlaŭ, nielha zakryvać svoj rynak dla maleńkaj krainy tolki za toje, što taja zachacieła ŭ Jeŭropu. «U adzinočku zastacca i vyłuzvacca pierad śvietam — śmierci padobna», — zajaviŭ Łukašenka.
Prezident taksama padkałoŭ Uładzimira Pucina, jaki, budučy ŭ Minsku na samicie, papraknuŭ Biełaruś u reeksparcie zabaronienaj polskaj pradukcyi.
Tady rasiejski lider pakazaŭ na kamiery fatahrafiju, na jakoj, jak skazaŭ Łukašenka, byli niejkich «dva palcy». Potym i zusim nazvaŭ zdymak «łažiej», jakuju padsunuli Pucinu karumpavanyja rasijskija mytniki. Dy i naohuł abvinavačvańni Biełarusi ŭ reeksparcie — heta prapahanda ŭ intaresach «łabistaŭ, žulikaŭ, jakija vyrablajuć anałahičnuju pradukcyju ŭ Rasiei».
Dy i naohuł ŭviali svajo embarha i navat nie papiaredzili, praciahvaŭ svaju krytyku Łukašenki.
Prezident paskardziŭsia na pravał madernizacyi «u susiedniaj krainie», u jakoj zaraz «z abstalavańniem biada», Biełaruś apynułasia vymušana zakuplać zachodnija technałohii dla našaha zavoda hazietnaj papiery. Tyja ž prablemy byli z madernizacyjaj ajčynnaj Biarozaŭskaj HRES, dzie pryjšoŭ rasiejski ambasadar, parekamiendavaŭ źviazacca «z hetymi». A zaraz «jak źviazalisia, raźviazacca nie možam», i dziesiać čałaviek u turmie.
Dastałasia Rasii i za vajennaje supracoŭnictva.
Maŭlaŭ, Amieryka svajmu sajuźniku Izrailu dapamahaje abaronku raźvivać, a my vymušanyja rasijskaje ŭzbrajeńnie zakuplać za svaje hrošy. «Vy viedajecie, u tym, što my pakul nie ŭmiejem rabić, dapamahajuć, na žal, inšyja, nie rasiejcy», — panarakaŭ prezident.
Što heta byŭ za patok antyrasiejskaha adkryćcia, zastajecca zahadkaj.
Ci to zaniataść Pucina Ukrainaj rassłablaje. Ci to i napraŭdu tak nakipieła, što strymlivacca ciažka. Ale kali my i nadalej budziem tak dziakavać «starejšamu bratu» za doŭhačakanyja sastupki pa naftavych pošlinach i tolki što vydadzienyja im kredyty, to jeŭrazijskaje kino abiacaje być cikavym.
