Siarod tych, chto pryjšoŭ na cyrymoniju raźvitańnia, jakaja prajšła ŭ rytualnaj zale na vulicy Alšeŭskaha, byli pieršy kiraŭnik niezaležnaj Biełarusi Stanisłaŭ Šuškievič, eks-kandydat u prezidenty na vybarach 2006 hoda Alaksandr Kazulin, lider hramadzianskaj kampanii «Havary praŭdu» Uładzimir Niaklajeŭ i jahony namieśnik Andrej Dźmitryjeŭ, hałoŭny redaktar haziety «Narodnaja vola» Iosif Siaredzič i šef-redaktarka vydańnia Śviatłana Kalinkina, kiraŭnik kaardynacyjnaha kamiteta Nacyjanalnaj płatformy Forumu hramadzianskaj supolnaści Uschodniaha partniorstva Uładzimir Mackievič, pradstaŭnik ambasady ZŠA Krystafier Panika, kiraŭnik pradstaŭnictva Jeŭraźviazu ŭ Biełarusi Majra Mora, žurnalist Alaksandr Tamkovič, staršynia BKDP Alaksandr Jarašuk, eks-staršynia Mienharvykankama i były premjer-ministr Uładzimir Jarmošyn, były kiraŭnik spravaŭ Łukašenki Ivan Ciciankoŭ, kiraŭnik pieradvybarčaha štaba Łukašenki ŭ 1994 hodzie Leanid Sinicyn dy inšyja, piša BiełaPAN.
Inšy blizki, u minułym, siabar sp. Maryniča, jahony kaleha pa pracy ŭ Minharvykankamie Michaił Miaśnikovič, ciapierašni premjer-ministr, na cyrymonii raźvitańnia nie prysutničaŭ.
Jak adznačyŭ syn palityka Ihar Marynič, u 2001 hodzie jahony baćka, zajmajučy ŭ toj momant pasadu ambasadara Biełarusi ŭ Łatvii, pryniaŭ pastanovu ŭdzielničać u prezidenckaj vybarčaj kampanii.
«Treba było dapamahčy krainie, i heta byŭ jahony śviadomy vybar. Pravilna ci niapravilna jano było, ciažka mierkavać. Historyja pakaža, — skazaŭ Ihar Marynič. — Ale jon ździejśniŭ učynak, učynak mužčyny. Ja zaŭsiody pavažaŭ jaho za heta i padtrymlivaŭ va ŭsim. Baćka zaŭsiody byŭ prykładam, ja zaŭsiody byŭ raŭniaŭsia na jaho, kali prymaŭ niejkija pastanovy».
Stanisłaŭ Šuškievič adznačyŭ, što Michaił Marynič byŭ «vielmi sumlenny i prystojny čałaviek». «Podły režym z tak zvanym prezidentam adabrali ŭ jaho vialikuju častku žyćcia. Heta čarhovaja achviara našaha režymu, — skazaŭ jon. — Heta byŭ hodny čałaviek, jaki zaŭsiody kiravaŭsia sumleńniem i prystojnaściu i ščyra lubiŭ Biełaruś».
Uładzimir Mackievič adznačyŭ, što dahetul u Łatvii ŭspaminajuć Maryniča jak «najlepšaha biełaruskaha ambasadara i adnaho z najlepšych siarod usich zamiežnych pasłoŭ u Łatvii». «Jaho pasadzili za ŭdzieł u prezidenckaj kampanii, i heta byŭ znak kožnamu sumlennamu čynoŭniku, što jon pavinien albo syści, albo nie vysoŭvacca, - skazaŭ Mackievič. - Toje, što jon tak rana pajšoŭ, heta nastupstvy turemnaha pieryjadu, dzie jamu padarvali zdaroŭje».
Uładzimir Jarmošyn adznačyŭ, što paznajomiŭsia z Maryničam na rekanstrukcyi ramontnaha zavoda ŭ 1969 hodzie. «45 hadoŭ my siabravali, skazaŭ jon. — Jon niejak i ŭ dušy, i z vyhladu zaŭsiody byŭ zvarušlivy čałaviek, zaŭsiody chacieŭ zrabić lepš. Jon zaŭsiody prychodziŭ na dapamohu».
Jarmošyn nahadaŭ, što Marynič pracavaŭ namieśnikam staršyni i staršyniom Minharvykankama. «I mianie zaciahnuŭ u hety harvykankam», — skazaŭ jon. Havoračy ab udziele Maryniča ŭ vybarach, Jarmošyn adznačyŭ: «Heta jahonaja była pastanova, Miša vybraŭ hety šlach».
Eks-kiraŭnika spravami prezidenta Ivan Ciciankoŭ padkreśliŭ, što viedaŭ Maryniča jak «nadzvyčaj prystojnaha čałavieka». «Jon zaŭsiody ludziam dapamahaŭ i pa-inšamu prosta nie moh. Na ŭsich pasadach da spravy jon staviŭsia dobrasumlenna. Nikoha ŭ žyćci nie moh pakryŭdzić i nie pakryŭdziŭ», — skazaŭ jon.
Uładzimir Niaklajeŭ adznačyŭ, što Marynič byŭ «adnym z samych śvietłych biełarusaŭ, jakich davodziłasia sustrakać». «Jon lubiŭ žyćcio, Biełaruś i tych ludziej, ź jakimi žyŭ pobač». «Mienavita luboŭ da Biełarusi, a nie ciaha da ŭłady, prymusiła jaho kinuć pasadu i pajści suprać tych ludziej, ź jakimi rabiŭ karjeru. Mienavita dziela lubovi da Biełarusi jon heta zrabiŭ», - skazaŭ Niaklajeŭ.
Paśla zakančeńnia cyrymonii raźvitańnia prajšło pachavańnie Michaiła Maryniča na Uschodnich (Maskoŭskich) mohiłkach Mienska.
