Pradstaŭniki minabarony Šviecyi apublikavali fatahrafiju (na fota ŭ centry) abjekta, jaki šukajuć u akvatoryi archipiełaha Stakholma.
Vajskoŭcy nie mohuć paviedamić, ci źjaŭlajecca hety abjekt niaspraŭnaj rasijskaj padvodnaj łodkaj. Takoje mierkavańnie vykazvali raniej miascovyja ŚMI.
Ekśpierty nie vyklučajuć, što kala Stakholma była zaŭvažana małaja padłodka, jakaja vykarystoŭvajecca dla vysadki dyviersantaŭ. Na borcie padvodnaj łodki typu «Tryton» moža znachodzicca da dziesiaci čałaviek.
Mnostva schieraŭ i drobnych astraŭkoŭ, nie na ŭsich ź jakich žyvuć ludzi, uskładniajuć pošuki i nazirańnie.
Raniej ŚMI i palitołahi raskrytykavali Minabarony Šviecyi za adsutnaść infarmacyi pra apieracyju, što viadziecca.
U niadzielu šviedskija vajskoŭcy dali karotkuju pres-kanfierencyju, na jakoj kontr-admirał Anders Hrenstad (Anders Grenstad) zajaviŭ: «My nie možam paćvierdzić infarmacyju ŭ ŚMI pra rasiejskuju padvodnuju łodku ŭ Stakholmskim archipiełahu».
Minabarony prademanstravała zdymak, na jakim paznačyła try punkty, dzie była zafiksavanaja padvodnaja aktyŭnaść. Taksama była pakazana fatahrafija padazronaha abjekta, zroblenaja ŭ niadzielu 19 kastryčnika. Kontradmirał skazaŭ, što fatohraf pabačyŭ abjekt na pavierchni vady, ale paśla fatahrafavańnia abjekt apuściŭsia pad vadu. Hrenstad adznačyŭ, što pakul nie ŭstanoŭlena, ci źjaŭlajecca padazrony abjekt rasiejskaj padvodnaj łodkaj. Ale było skazana, što ŭ ich jość dakładnyja źviestki ab zamiežnaj dziejnaści ŭ šviedskich terytaryjalnych vodach i ciapier viaducca pravierki.
Raniej viadučaja šviedskaja hazieta Svenska Dagbladet paviedamlała ab mahčymym vyjaŭleńni ŭ terytaryjalnych vodach krainy padvodnaj łodki. Pa dadzienych vydańnia, byŭ pierachopleny radyjosihnał, jaki rasijskija vajskoŭcy vykarystoŭvajuć u ekstranych situacyjach. Razmova viałasia na rasiejskaj movie.
Taksama šviedskija ŚMI apublikavali schiemy dziŭnaha kursu rasijskaha tankiera NS Concord i raźviedvalnaha sudna «Prafiesar Łahačoŭ», jakija mohuć być źviazanyja z padłodkaj i ciapier znachodziacca pablizu Stakholmskaha archipiełaha.
