U madrydskim špitali Karłasa III.
Ułady Ispanii paviedamili pra admoŭnyja vyniki testaŭ miedsiastry Terezy Ramera - pieršaha čałavieka, što zaraziŭsia lichamankaj Eboła za miežami Afryki.
Atrymanyja vyniki dazvalajuć vykazać zdahadku, što 44-hadovaja Ramera bolš nie infikavanaja virusam Eboła.
Miedsiastra pavinna budzie prajści paŭtorny analiz, i kali jon taksama apyniecca niehatyŭnym, jaje možna budzie ličyć całkam zdarovfq.
Tereza Ramera zaraziłasia Eboła ŭ balnicy ŭ Madrydzie dahladajučy dvuch katalickich śviataroŭ, što zachvareli Eboła ŭ Afrycy. Abodva paśla pamierli.
Pa słovach miedsiastry, jana, vierahodna, nieaściarožna kranuła svoj tvar rukoj u palčatcy paśla adnaho sa śviataroŭ.
Ad epidemii lichamanki Eboła ŭ Zachodniaj Afrycy ŭžo pamierła zvyš 4500 čałaviek.
Ramera znachodzicca pad nahladam daktaroŭ u madrydskaj balnicy Karłasa III.
Ispanskija miedyki nie raskryvajuć, jakija mienavita mietady lačeńnia jany vykarystoŭvali.
Adnak srodkam masavaj infarmacyi stała viadoma, što ŭ liku inšych lekaŭ Ramera davali syrovatku kryvi z antyciełami, uziatuju ŭ tych, chto ŭžo vyzdaravieŭ ad Eboły.
U karancinie ŭ balnicy Karłasa III u Madrydzie znachodziacca jašče 15 čałaviek, u tym liku muž Terezy Ramera.
Pa słovach pradstaŭnikoŭ balnicy, da hetaha času ŭ nivodnaha ź ich simptomy lichamanki Eboła nie prajavilisia.
Inkubacyjny pieryjad chvaroby moža doŭžycca ad dvuch dzion da troch tydniaŭ.
Raniej, paśla taho jak u arhaniźmie Ramera byŭ znojdzieny virus Eboły, ułady pa pastanovie suda usypili sabaku miedsiastry pa mianušcy Eskalibur.
Pry hetym nie było nijakich śviedčańniaŭ taho, što žyvioła chvoraja na lichamanku Eboła, abo što jana moža stać pieranosčykam infiekcyi.
