Aŭkcyjon pa prodažy kompleksu budynkaŭ pa vuł. Kastryčnickaj, 16 pravodzicca ŭpieršyniu. Pra toje, što rajon zabudovy vulicy Kastryčnickaj varta vykarystoŭvać bolš efiektyŭna, havaryłasia nie raz. Centr horada, kałarytnyja pramysłovyja budynki pačatku XX stahodździa — idealnaja placoŭka dla stvareńnia kulturna-zabaŭlalnaj prastory. Trymać tut sučasnuju vytvorčaść nie vyhadna — pomniki architektury pierabudoŭvać zabaroniena achoŭnym zakanadaŭstvam, tamu vytvorcam nie razharnucca.
I całkam łahičnym vyhladaje toje, što «ŭ metach pavyšeńnia efiektyŭnaści vykarystańnia majomaści AAT «MZOR» — kirujučaja kampanija chołdynhu «Biełstankainstrumient» vystaviła čatyry svaje budynki na tarhi.
Pačatkovy košt łota 116.153.808 biełaruskich rubloŭ z PDV — krychu mienš za 11 miljonaŭ dalaraŭ. Ahulnaja płošča administracyjna-bytavych i vytvorčych karpusoŭ — amal 7000 kvadratnych mietraŭ. Abjekty mieściacca na ŭčastku płoščaj bolš za 9,5 hiektara, jon pieradajecca pradaŭcu na prava časovaha karystańnia (pa 2019/12/31). U łota jość abciažarańnie ŭ vyhladzie damovaŭ arendy (nahadajem, u adnym z budynkaŭ mieścicca bar «Chulihan»).
U metach zachavańnia cełasnaści historyka-architekturnaha kompleksu «budynki byłoha mietałaapracoŭčaha zavoda», jakija źjaŭlajucca pa kłasifikacyi treciaj katehoryjaj historyka-kulturnaj kaštoŭnaści, pradajucca adnym łotam.
— U adpaviednaści z hienieralnym płanam h. Minska vytvorčy kompleks AAT «MZOR» padlahaje vynasu, — rastłumačyŭ pradstaŭnik arhanizatara aŭkcyjonu. — Horadabudaŭničym prajektam praduhledžana transfarmacyja isnujučaj vytvorčaj zabudovy pradpryjemstva z raźmiaščeńniem inviestycyjnych učastkaŭ dla budaŭnictva handlova-zabaŭlalnaha kompleksu, vystavačna-muziejnaha kompleksu i šmatuzroŭnievaj aŭtastajanki. budynak byłoha mietałaapracoŭčaha zavoda, uklučany ŭ śpis historyka-kulturnych kaštoŭnaściaŭ RB, zachoŭvajecca, jon padlahaje restaŭracyi i prystasavańniu dla stvareńnia muziejna-aśvietnickaha kompleksu.
Tak jak pradmiet aŭkcyjonu źjaŭlajecca historyka-kulturnaj kaštoŭnaściu, novy ŭłaśnik majomaści abaviazany na praciahu adnaho miesiaca padpisać achoŭnyja abaviazacielstvy.
Arhanizatar aŭkcyjonu — ZAT «Centr pramysłovaj acenki». Aŭkcyjon adbudziecca 5 listapada 2014, zajaŭki prymajucca da 3 listapada.
Prykład pieratvareńnia pramzony ŭ handlovy centr možna razhledzieć na prykładzie handlovaha centra ŭ Biełastoku.
