Alaksandr Łukašenka maje namier viarnuć paniaćcie «darmajedstva». Ab hetym jon zajaviŭ 20 kastryčnika na naradzie pa pytańniach zaniataści i mihracyi ŭ krainie, paviedamili ŭ pres-słužbie kiraŭnika dziaržavy.

U adnosinach da hramadzian, jakija nie pracujuć i ŭ byłyja časy nazyvalisia darmajedami, MUS inicyiravała ŭvieści ŭ Kodeks ab administracyjnych pravaparušeńniach normu, jakaja daść mahčymaść pryciahvać ich da adkaznaści, u tym liku i da prymusovaha pracaŭładkavańnia.

Alaksandr Łukašenka padtrymaŭ hetu prapanovu. «Chočacie viarnuć paniaćcie «darmajedstva» — viartajcie. Heta budzie bolš zrazumieła dla naroda, — skazaŭ jon. — Nie treba ničoha dobraha, što było ŭ savieckija časy zroblena, adkidvać, u tym liku i terminałohiju».

«Lubymi sposabami, jakija my viedajem i ŭmiejem rabić, treba prymusić hetych ludziej pracavać! — padkreśliŭ Łukašenka. — Da 1 studzienia pryniać miery, kab usie pracavali, prymusić usich pracavać!»

Jon adznačyŭ, što padtrymlivaje ŭsie ahučanyja ŭ hetym płanie prapanovy ŭrada.

«Prymajcie da 1 studzienia ŭsie rašeńni, davodźcie da hramadstva, a z 1 studzienia jany pavinny na praktycy realizoŭvacca», — skazaŭ Alaksandr Łukašenka, uskłaŭšy na Administracyju prezidenta kantrol za vykanańniem daručeńnia. Pry hetym kiraŭnik dziaržavy dadaŭ, što na hetyja mierapryjemstvy nie pavinny raschodavacca biudžetnyja srodki.

Ministr unutranych spraŭ Ihar Šunievič dałažyŭ ab mihracyjnaj situacyi ŭ krainie i tendencyjach źniešniaj pracoŭnaj mihracyi. Ministr prapanavaŭ praanalizavać patrebnaści rehijonaŭ u pracoŭnych resursach, vyznačyć pradpryjemstvy, hatovyja zabiaśpiečyć rabotnikaŭ žyllom i zarabotnaj płataj, i akumulavać hetu infarmacyju ŭ terytaryjalnych centrach zaniataści nasielnictva. Na jaho dumku, treba pierahledzieć płany abłasnych i rajonnych vykankamaŭ pa raśsialeńni nasielnictva z ulikam demahrafičnaj i ekanamičnaj situacyi ŭ rehijonach.

Alaksandr Łukašenka asabliva źviarnuŭ uvahu na toje, što žyllo nieabchodna budavać tam, dzie nie chapaje rabočaj siły abo dzie nieabchodna stvarać rabočyja miescy. «Para ŭžo ad razmoŭ pierajści da spravy!» — padkreśliŭ kiraŭnik dziaržavy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?