Padvodnaja łodka U-576.
Amierykanskija daśledčyki znajšli niamieckuju padvodnuju łodku, patoplenuju avijacyjaj letam 1942 hoda, kala ŭźbiarežža štata Paŭnočnaja Karalina, paviedamiła Si-En-En na hetym tydni.
Łodka pad indeksam U-576 lažała na dnie ŭ 230 mietrach ad amierykanskaha tankiera Bluefields, patoplenaha joj u bai.
«Heta nie prosta znachodka adnaho karabla, my znajšli miesca važnaj bitvy, jakaja była častkaj Bitvy za Atłantyku. Hetyja dva karabli adździelenyja ŭsiaho niekalkimi sotniami mietraŭ i dapamahajuć nam zrazumieć ich zabytuju historyju», — kaža Džo Chojt, kiraŭnik ekśpiedycyi, jakaja znajšła karabli.
Łodka ciapier.
Amierykanski tankier patanuŭ, ale ŭsia jahonaja kamanda była ŭratavanaja. Uvieś ekipaž niamieckaj padvodnaj łodki — 45 čałaviek — zahinuŭ.
U bai padłodka, jakuju ŭžo atakavali bajavyja karabli, što achoŭvali kanvoj, zdoleła ciažka paškodzić jašče dva sudny.
Padčas Bitvy za Atłantyku, jak jaje nazvaŭ premjer-ministr Vialikabrytanii Uinstan Čerčyl u 1941 hodzie, Niamieččyna sprabavała masiravanym vykarystańniem padvodnych łodak razarvać marskija kamunikacyi pamiž Brytanijaj, jaje zamorskimi ŭładańniami i ZŠA.
Pierałom u zmahańni, jak ličycca, nastupiŭ u 1943 hodzie, dziakujučy novym technałohijam, vykarystanym ZŠA i Brytanijaj, i dapamozie avijacyi.
