Mižnarodny ekśpiert u śfiery enierhietyčnaj palityki Majkł Šnajder miarkuje, što najaŭnaja ekanamičnaja situacyja va ŭschodniejeŭrapiejskim rehijonie nie dazvolić Biełarusi zaviaršyć prajekt budaŭnictva atamnaj stancyi ŭ Astraŭcy (Hrodzienskaja vobłaść).
Takuju dumku Šnajder vykazaŭ 25 kastryčnika na vialikaj partniorskaj kanfierencyi Mižnarodnaha adukacyjnaha centra ŭ pasiołku Kšyžova (Polšča) padčas prezientacyi spravazdačy ab suśvietnym jadziernym statusie 2014 hoda, viadučym aŭtaram-układalnikam jakoha jon źjaŭlajecca.
«Nie dumaju, što jadzierny reaktar u Biełarusi naohuł budzie pabudavany, — skazaŭ jon. — Toje, što jaho pačali budavać, jašče nie aznačaje, što hety prajekt budzie zavieršany, bo ŭ najaŭnaj ekanamičnaj situacyi ŭ hetym rehijonie taki zatratny abjekt vielmi ciažka pabudavać».
Na dumku Šnajdera, tarmažeńniu budaŭncitva atamnaj stancyi ŭ Astraŭcy pasadziejničaje toj fakt, što Rasija, jakaja faktyčna finansuje hety prajekt, zaraz znachodzicca ŭ «ciažkim ekanamičnym stanoviščy». «Viadoma, Rasija moža kros-subsidavać Biełaruś za košt nafty i hazu, ale ceny na naftapradukty ŭ śviecie padajuć», — zaznačyŭ ekśpiert, dadaŭšy, što ŭ hetym śviatle «vielmi małaja kolkaść anałahičnych rasijskich prajektaŭ budzie zavieršana».
Nahadajem, dla budaŭnictva AES u Astraŭcy vybrany prajekt rasijskaj kampanii «Atambudekspart», hienieralnym prajekciroŭščykam i padradčykam vystupaje rasijskaja kampanija AAT «NIAEP» — ZAT «ASE». Miarkujecca, što stancyja budzie składacca z dvuch enierhabłokaŭ sumarnaj mahutnaściu da 2.400 MVt. Uvod u ekspłuatacyju pieršaha błoka zapłanavany na listapad 2018 hoda, druhoha — na lipień 2020-ha.
U pačatku kastryčnika hetaha hoda stała viadoma, što ŭrad Rasijskaj Fiederacyi rasparadziŭsia vydzielić Biełarusi kredyt da 10 młrd. dołaraŭ na budaŭnictva atamnaj elektrastancyi.
Ministr enierhietyki Uładzimir Patupčyk 15 kastryčnika ŭ Minsku zajaviŭ žurnalistam, što sioleta na budaŭnictvie Biełaruskaj AES budzie asvojena bolš za 450 młn. dołaraŭ. Jon taksama paviedamiŭ, što budaŭnictva pieršaha błoka idzie pa hrafiku, a druhoha — navat krychu apiaredžvaje hrafik. Nieabchodnyja srodki buduć asvojvacca pa ŭzrastajučaj. «My naroščvajem mahutnaści našych subpadradnych arhanizacyj i dla hetaha stvarajem nieabchodnuju infrastrukturu ŭ Astraŭcy, dla taho kab u 2015—2016 hadach raźmiaścić maksimalnuju kolkaść budaŭnikoŭ i mantažnikaŭ», — skazaŭ Patupčyk.
