Reuters.com
Francyja trapiła ŭ składanuju situacyju ź vialikaj rasijskaj zamovaj na pabudovu dvuch desantnych viertalotanoscaŭ typu «Mistral».
«Mistral» francuskaha fłotu ŭ razrezie
Z adnaho boku na fonie rasijska-ŭkrainskaha kanfliktu suprać pieradačy «Mistralaŭ» vystupajuć mnohija jaje sajuźniki, u pryvatnaści Polšča i krainy Bałtyi.
Ź inšaha boku ŭrad Francyi choča padtrymać ułasny vajskova-pramysłovy kompleks, i prademanstravać svaju nadziejnaść jak pastaŭščyka zbroi. Dla sacyjalistaŭ pry ŭładzie taksama važna, što zamiežnyja vajskovyja zamovy zabiaśpiečvajuć francuzam kala 50 000 pracoŭnych miescaŭ.
Na hetym tle ekśpierty časopisa Foreign Policy prapanavali kampramis — karabli buduć dabudavanyja, ale zdadzienyja ŭ lizinh dla farmavańnia ahulnajeŭrapiejskaj amfibijnaj hrupoŭki, jakaja b mahła vykonvać i humanitarnyja, i vajskovyja zadačy pa ŭsim śviecie.
Pabudova «Mistrala»
«Mistrali» ŭ ES mahli b vykarystoŭvacca i jak bajavyja desantnyja karabli-viertalotanoscy, i jak mabilnyja marskija špitali, i dla evakuacyi mirnaha nasielnictva z kanfliktnych zonaŭ. Jany mahli b zmahacca ź piractvam i z marskoj kantrabandaj narkotykaŭ, i ź nielehalnaj mihracyjaj.
Ekśpierty pryznajuć składanaść dasiahnieńnia takoj damoŭlenaści dla francuzskich dypłamataŭ, ale adznačajuć, što heta mahło b zabiaśpiečyć i sacyjalna-ekanamičnyja patreby Francyi, i padtrymać vajskovyja mahčymaści i prestyž ES.
Univiersalnyja desantnyja karabli typu «Mistral» mohuć prymać na bort da 450 čałaviek desantu (na karotki čas - da 900 čałaviek), 16 viertalotaŭ. Papiarednim vajskovym karablom, jaki pabudavali francuzy dla Rasii, byŭ krejsier «Admirał Makaraŭ» — u 1908 hodzie.
Kantrakt na «Mistrali» praduhledžvaje, što dva karabli buduć pabudavanyja ŭ Francyi, jašče dva paśla pieradačy techničnaj dakumientacyi — u RF.
