Prakuratura Salihorskaha rajona razhledzieła skarhu miascovaha demakratyčnaha aktyvista Uładzimira Šyły na dziejańni supracoŭnikaŭ milicyi padčas praviadzieńnia tak zvanaha ahladu ŭ jaho pryvatnym domie. U chodzie pravierki padstaŭ dla pryniaćcia mier prakurorskaha reahavańnia prakuror rajona Aleh Aŭdziej nie pabačyŭ.
Padčas pravierki było ŭstanoŭlena, što ahlad doma viadomaha na Salihorščynie apazicyjaniera pravodziŭsia na padstavie pastanovy, vyniesienaj apierupaŭnavažanym adździaleńnia pa narkakantroli i supraćdziejańni handlu ludźmi, i byŭ sankcyjanavany prakuroram. Admovu milicyjantaŭ dać Uładzimiru Šyłu kopiju pratakoła ahladu sa śpisam vyniataj u jaho kampjutarnaj techniki prakuror patłumačyŭ adsutnaściu adpaviednaj normy ŭ Kryminalna-pracesualnym kodeksie.
Sam aktyvist nazyvaje takuju situacyju absurdnaj. Ahlad byŭ praviedzieny, technika milicyjantami zabranaja, a dakumientalnaha paćvierdžańnia hetamu ŭ aktyvista niama. U takich abstavinach, jak i ŭ vypadku z ahladam i vymańniem majomaści ŭ salihorskaha moładzievaha aktyvista Uładzimira Lemieša, spadar Šyła nie moža być upeŭnienym u nadziejnym zachavańni svaich asabistych rečaŭ. Nielha być upeŭnienym i ŭ tym, što ŭ pratakole nie źjaviacca jakija-niebudź dakumienty ci pradmiety, jakich u jaho nasamreč nie vymali.
