Šviedskija daśledčyki Sušytra Sumitran-Cholhiersan z Hioteborhskaha Univiersiteta i Mikael Ołaŭsan z Salhrenskaha akademičnaha špitala zmahli vyraścić dvum pacyjentam vieny, prydatnyja dla transpłantacyi. Pry hetym materyjałam dla stvareńnia orhanaŭ stała nievialikaja kolkaść kryvi samich pacyjentaŭ.
Pra heta paviedamlaje artykuł u śviežym časopisie EBioMedicine. Adnak apieracyi byli praviedzienyja jašče ŭ 2012 hodzie.
Dvum maleńkim dzieciam brakavała vieny, što złučaje straŭnikava-kišačny trakt ź piečańniu. Tamu ŭračy vyrašyli vyraścić vieny i pierasadzić ich dzieciam.
Padobnuju manipulacyju ŭžo ažyćciaŭlali raniej u Salhrenskim akademičnym špitali. Tady vienu vyraścili sa stvałavych kletak kaścianoha mozhu pacyjenta. Adnak pracedura śvidravańnia kaścianoha mozhu nadzvyčaj balučaja, tamu Sumitran-Cholhiersan i Ołaŭsan vyrašyli zdabyć stvałavyja kletki naŭprost z kryvi.
U dziaciej uziali pa 25 mililitraŭ kryvi (kala dźviuch stałovych łyžak) — minimalny abjom dla vydzialeńnia nieabchodnaj kolkaści stvałavych kletak.
Usiaho za tydzień byli vyraščanyja vieny, jakija paśpiachova transpłantavali dzieciam. U papiarednim vypadku dadzieny praces zaniaŭ miesiac. Sušytra Sumitran-Cholhiersan skazała, što kroŭ utrymlivaje kampanienty, jakija padhaniajuć rost, tamu termin stvareńnia orhana byŭ taki karotki.
