AFP
Śledstva paviedamiła pra niedastatkovuju kolkaść dokazaŭ pa spravie ab krušeńni rejsa MH17. Pra heta paviedamlaje Spiegel u paniadziełak 27 kastryčnika.
Tych dokazaŭ, jakija jość u śledstva pa spravie ab krušeńni małazijskaha «Boinha» rejsa MH17 u niebie nad Ukrainaj 17 lipienia, nie chapaje, kab vyznačyć dakładnuju pryčynu katastrofy i nazvać adkaznych za jaje.
«My nie ŭpeŭnienyja ŭ tym, ci ŭsio ŭ nas užo jość, ci moža jašče isnuje dadatkovy materyjał, mahčyma, jašče bolš śpiecyfičny. Taho, što ŭ nas majecca, u lubym vypadku niedastatkova, kab rabić kančatkovyja vysnovy. My i dalej znachodzimsia ŭ kantakcie z ZŠA, kab atrymać spadarožnikavyja zdymki», — raspavioŭ hałandski prakuror Fred Viesterbiekie.
Pavodle jaho słoŭ, vyznačyć kankretnaha vinavataha avijakatastrofy pry dapamozie dokazaŭ zaraz niemahčyma.
«Zychodziačy ź isnujučaj infarmacyi, abstreł rakietaj «ziamla-pavietra» z majho punktu hledžańnia źjaŭlajecca najbolš vierahodnym scenarom. Ale my nie zapluščvajem vočy na vierahodnaść taho, što heta mahło być niešta inšaje», — paviedamiŭ jon.
Viesterbiekie zajaviŭ, što Niderładny rychtujuć pravavuju asnovu dla zvarotu da Maskvy pa dadatkovuju infarmacyju.
9 kastryčnika źjaviłasia infarmacyja ab vyjaŭleńni adnaho z zahinułych z kisłarodnaj maskaj. Hety fakt pastaviŭ pad sumnieŭ viersiju imhniennaj hibieli pasažyraŭ samalota.
U vyniku katastrofy samalota Boeing avijakampanii Malaysia Airlines ŭ Danieckaj vobłaści zahinuli 283 pasažyry i 15 členaŭ ekipaža. Samalot nakiroŭvaŭsia pa maršrucie Amsterdam — Kuała-Łumpur. Ułady Ukrainy i pradstaŭniki samaabvieščanaj «Danieckaj narodnaj respubliki» ŭskładajuć adkaznaść za krušeńnie łajniera adzin na adnaho.
Raniej, 9 vieraśnia, Rady biaśpieki Niderłandaŭ pradstaviła papiaredni dakład ab pryčynach krušeńnia samalota. U im paviedamlajecca, što małajzijski «Boinh» paciarpieŭ krušeńnie ŭ vyniku šmatlikich paškodžańniaŭ zvonku.
