Minsk moža poŭnaściu pierajści na vadu z padziemnych krynic da 2020 hoda. Takoje mierkavańnie vykazaŭ siońnia žurnalistam načalnik upraŭleńnia haradskoj haspadarki i enierhietyki Minharvykankama Dźmitryj Jančyk.
«Dakładnuju datu, kali Minsk poŭnaściu piarojdzie na vadu z padziemnych krynic, nazvać nie mahu — usio budzie zaležać ad vykanańnia zapłanavanych rabot, ad finansavańnia. Prahrama aryjentavana na 2030 hod, ale my budziem imknucca, kab heta adbyłosia jak maha chutčej. Mahčyma, da 2020 hoda ŭvieś Minsk piarojdzie na artezijanskija śvidraviny», — skazaŭ Dźmitryj Jančyk.
Pavodle jaho słoŭ, spažyvańnie vady z pavierchnievych krynic budzie źnižacca paetapna. «Na minułym tydni adbyłasia narada pa prahramie «Čystaja vada» z udziełam namieśnika ministra žyllova-kamunalnaj haspadarki, pieršaha namieśnika staršyni Minharvykankama, na jakoj było pryniata rašeńnie vykarystoŭvać isnujučyja krynicy šlacham ich rekanstrukcyi, šlacham pavieličeńnia ich debietu», — kanstatavaŭ śpiecyjalist.
Ciapier u Minsku dziejničajuć 344 śvidraviny na 16 padziemnych vodazaborach. Niekatoryja śvidraviny buduć pieraśvidroŭvać z metaj pavieličeńnia pradukcyjnaści. Prosta bureńnie taksama budzie pravodzicca, źjaviacca novyja śvidraviny. Pavodle słoŭ Dźmitryja Jančyka, u 2015-2016 hadach u vyniku pavieličeńnia debietu śvidravin Minsk atrymaje 22 tys. kub.m vady z padziemnych krynic.
Ciapier vadu z pavierchnievych krynic atrymlivajuć žychary Maskoŭskaha i Frunzienskaha, a taksama častki Kastryčnickaha rajonaŭ Minska.
