Viadomy amierykanski historyk ź Jelskaha ŭniviersiteta Cimaci Snajder (Timothy Snyder) vystupiŭ 27 kastryčnika ŭ Centry stratehičnych i mižnarodnych daśledavańniaŭ u Vašynhtonie na temu «Vajna Rasii, historyja Ukrainy i vybar Zachadu».
«Zachad maje dva varyjanty adnosna ŭkrainskaha kanfliktu — być ci nie być, — kaža Snajder. — Heta kanflikt ab kaštoŭnaściach, pryncypach i isnavańni nie Ukrainy, a Jeŭrapiejskaha Sajuza».
U vajnie suprać Ukrainy Rasija vykarystoŭvaje taktyku «asimietryčnaj vajny naadvarot», kali macniejšy bok u kanflikcie vykarystoŭvaje zbroju słaboha. Voś što jon maje na ŭvazie.
1) Rasija vystaŭlaje siabie nie ahresaram, a słabaj krainaj, jakoj dazvolena šmat u supraćstajańni takoj mahutnaj dziaržavaj, jak ZŠA.
2) Značnaja dola nasielnictva Rasii suprać vajny va Ukrainie, bo dumajuć, što vajna suprać Ukrainy nie viadziecca. Pucin taki papularny tamu, što «jon pieramahaje biez vajny».
3) Łohika partyzanskaj vajny (asimietryčnaj vajny) — metanakiravana spravakavać adkaz supiernika, u hetym vypadku prymusić ukrainskija vojski da viadzieńnia bajavych dziejańniaŭ u mirnych haradach.
Meta Pucina — źniščeńnie ŭkrainskaj dziaržavy, na što namiakałasia šmat razoŭ roznymi sposabami: «Ukraina — niesapraŭdnaja dziaržava», «ruskija i ŭkraincy — adzin narod», sam termin «Navarosija». U hetym samym kantekście ŭžyvajecca ideja «ruskaha śvietu». A što aznačaje «Ruski śviet»? Toje, što dziaržavy Biełaruś i Ukraina nie isnujuć.
Rasija prytrymlivajecca stratehičnaha relatyvizmu, pry jakim, dla taho, kab stać macniejšym, treba zrabić supiernika słabiejšym. ES značna pieraŭzychodzić Rasiju pa bolšaści paramietraŭ, tamu taki padychod aznačaje, što zadača Rasii — razarvać suviazi ŭnutry Sajuza i pamiž ES i ZŠA. Robicca heta na roznych uzroŭniach: ad podkupu palitykaŭ i žurnalistaŭ da dyskredytacyi zachodnich kaštoŭnaściaŭ.
Darečy, Rasija padtrymlivaje pravyja siły ŭ Jeŭropy, u tym liku, nieanacystaŭ i nieafašystaŭ, bo spadziajecca, što jany razvalać Jeŭrasajuz znutry. Tak, naziralnikami na refierendumie ŭ Krymie byli pradstaŭniki mienavita hetych siłaŭ.
Rasija maluje ES jak pahrazły ŭ dekadenctvie i homaseksualiźmie, a samu siabie jak čystuju i chryścijanskuju krainu, jakaja ratuje jeŭrapiejskija ideały, stvarajučy vakoł siabie taki samy čysty Jeŭrazijski sajuz.
A jakuju łuchtu niasuć rasijskija ŚMI, palityki, artysty? Naprykład, adnačasova havorać, što
1) «niama nijakaj ukrainskaj dziaržavy», ale 2) «ŭkrainskaja dziaržava pryciaśniaje ruskich».
3) «Niama takoha asobnaha naroda «ŭkraincy», ale 4) «ŭsie ŭkraincy — banderaŭcy».
5) «Niama nijakaj ukrainskaj movy», ale 6) «ruskich prymušajuć na joj razmaŭlać».
7) «Rasija — vialikaja dziaržava», ale 8) «Rasija — kraina, jakuju mocnyja dziaržavy kryŭdziać».
9) «Rasija ratuje Jeŭropu ad fašyzmu», ale 10) «nie ŭsio tolki kiepskaje źviazana z Hitleram», pieraličyŭ hetyja supiarečlivyja punkty Snajder.
Što śviet moža zrabić dla Ukrainy? Voś što Snajder prapanuje:
«1. Pierśpiektyva členstva ŭ ES.
2. Ukrainu treba adbudavać jak maha chutčej.
3. Najlepšaj palitykaj datyčna Rasii stanie mocnaja Ukraina».
