Haradzienskija ŭłady praviali śviatkavańnie 100-hodździa samaha staroha ŭ horadzie, i Biełarusi, kinateatra. U 1915 hodździe kinateatr atrymaŭ nazvu «Edem», ale za napraciahu sta hadoŭ svajho isnavańnia jana mianiałasia niekalki razoŭ, pakul paśla Druhoj suśvietnaj vajny nie stała «Čyrvonaj Zorkaj».
Na śviatkavańnie haradziencam pakazali praciah epapiei pra haradzienskuju viosku – «Biełyja Rosy. Viartańnie». Na pakaz zavitaŭ litoŭski akcior Juozas Budrajcis, jaki vykanaŭ u filmie hałoŭnuju rolu.
Pra historyju kinateatra raspaviała śpiecyjalist pa historyi haradzienskaha kino — historyk Taćciana Kasataja:
— Jon byŭ pabudavany jašče ŭ 1914 hodzie, ale jaho ŭračystaje adkryćcio adbyvałasia paźniej na hod 1915, tamu možna skazać, što ŭ jaho dva jubilei. Hety kinateatr byŭ niezvyčajny tym, što jon byŭ pabudavany pa śpiecyjalnym prajekcie – heta śpiecyjalizavanaja kinateatralnaja zabudova była. Heta pieršaja takaja zabudova na terytoryi našaha horada, tamu jon vyłučajecca siarod astatnich kinateatraŭ. Adkryćcio adbyvałasia tady, kali Harodnia była pad akupacyjaj padčas pieršaj suśvietnaj vajny, u žniŭni 1915 hoda.
Taćciana Kasataja nieadnarazova źviartałasia da kiraŭnictva z prapanovaj dapamahčy ŭ arhanizacyi śviatkavańnia jubileja, adnak jaje prapanovy byli adkinuty.
