«Sumlennaść vybaraŭ nie zaležyć ad dakumientaŭ, jakija rehłamientujuć dziejnaść naziralnikaŭ, jana vyznačajecca pieradusim normami marali»,
— zajaviła staršynia Centrvybarkama Lidzija Jarmošyna, adkazvajučy 12 listapada na pytańni žurnalistaŭ u Minsku ŭ miežach mižnarodnaj kanfierencyi «Vybarčyja pracesy na prastory SND».
Pavodle jaje słoŭ, misija naziralnikaŭ ABSIE i misija naziralnikaŭ ad SND «pracujuć na svaich umovach i pryncypach».
«U misii ABSIE jość kiraŭnictva pa nazirańni za vybarami, jakoje pieryjadyčna ŭpotaj pierapracoŭvajecca i potym padajecca jak uzhodnieny dakumient. U nas jość vielmi jakasny dakumient, jakim źjaŭlajecca kanviencyja ab standartach spraviadlivych vybaraŭ, u nas jość šerah materyjałaŭ, jakija mietadyčna vyznačajuć dziejnaść naziralnikaŭ ad krain SND. Ja dumaju, my tak i budziem pracavać na asnovie kožny svajho statusu», — zajaviła Jarmošyna.
«Kali ŭ vas jość krytyčnyja pohlady na toje, jak pracuje naša misija, a ŭ nas jość krytyčnyja pohlady, jak pracuje vaša misija, to niadrenna b sieści za stoł i damovicca pra adzinyja praviły i potym pa ich pracavać, — adznačyŭ u svaju čarhu hienieralny sakratar — kiraŭnik sakrataryjata Savieta Mižparłamienckaj asamblei (MPA) SND Alaksiej Siarhiejeŭ. — Ale našy kalehi z ABSIE čamuści ŭžo šmat hadoŭ nie imknucca da hetaha».
Siarhieŭ taksama paviedamiŭ, što siońnia ŭzrovień vybarčaha zakanadaŭstva va ŭsich krainach SND «prykładna adnolkavy, rezkich adroźnieńniaŭ niama». «Zakanadaŭstva, jakoje vybudoŭvałasia na praciahu 20 hadoŭ, hruntavałasia ŭ tym liku na niekatorych madelnych zakonach, pryniatych u 90-ch hadach MPA SND. Ale, niesumnienna, tema ŭdaskanaleńnia madelnych zakonaŭ nie źniataja z paradku dnia», — skazaŭ jon.
