«Heta dobra adładžany transnacyjanalny złačynny vid dziejnaści, jaki prynosić kałasalnyja prybytki trafikioram i jaki zajmaje ŭ kryminalnym śviecie treciaje miesca pa prybytkovaści paśla handlu zbrojaj i narkotykami», — adznačyli ŭ pres-słužbie MUS.
Asnoŭnyja formy handlu ludźmi zastajucca ŭ Biełarusi praktyčna niaźmiennymi z 2000 hoda: heta złačynstvy, jakija ździajśniajucca ŭ metach sieksualnaj abo pracoŭnaj ekspłuatacyi.
Z 5102 achviar handlu ludźmi, ustanoŭlenych u 2002-2014 hadach, u sieksualnuju ekspłuatacyju trapili 4502 čałavieki, pracoŭnuju — 597, vyrazali orhany — 3.
Siońnia Biełaruś pieravažna źjaŭlajecca krainaj pachodžańnia «žyvoha tavaru». U metach sieksualnaj ekspłuatacyi trafikiory pierapraŭlajuć ludziej, jak praviła, u krainy Jeŭrasajuza, na Blizki Uschod i ŭ niekatoryja rehijony Rasijskaj Fiederacyi (pieravažna heta h. Maskva i Maskoŭskaja vobłaść).
Asnoŭnym viektaram vyvazu biełarusaŭ z metaj pracoŭnaj ekspłuatacyi źjaŭlajecca Rasija. Taksama zafiksavana niekalki vypadkaŭ pracoŭnaj ekspłuatacyi našych hramadzian u Turcyi i Polščy.
Z 2006 h. u respublicy vyjaŭlajucca asobnyja adzinkavyja fakty, kali Biełaruś vystupaje krainaj pryznačeńnia. Za hety čas byli ŭstanoŭleny achviary handlu ludźmi z Rasii, Ukrainy i Małdovy.
Akramia taho, isnuje ŭnutranaja ekspłuatacyja (kali biełaruskija hramadzianie ekspłuatujucca na terytoryi Biełarusi). Tut sieksualnaja ekspłuatacyja taksama pieravažaje nad pracoŭnaj.
Z 2011 tendencyja takaja, što kolkaść achviar ŭnutranaj ekspłuatacyi pieravyšaje kolkaść achviar, jakija traplajuć u ekspłuatacyi za miažoj (raniej było naadvarot).
U 2011 h. na terytoryi Biełarusi ŭ ekspłuatacyju trapili 153 achviary, a za miažu byli vyviezieny 142 (2012 — 124 i 85; 2013 — 90 i 59; za 10 miesiacaŭ 2014 — 55 i 43 adpaviedna).
Apošnim časam raście kolkaść administracyjnych pravaparušeńniaŭ, źviazanych ź niezakonnym pracaŭładkavańniem hramadzian Biełarusi za miažoj (kryminalnaja adkaznaść za niezakonnaje pracaŭładkavańnie za miažoj nastupaje tolki ŭ tym vypadku, kali dakazvajecca fakt ekspłuatacyi). Kali ŭ 2011 było vyjaŭlena 123 administracyjnych pravaparušeńnia, to ŭ 2012 h. — 144, u 2013 — 157, a za 9 miesiacaŭ 2014 — 51.
Z 2002 pravaachoŭnymi orhanami Biełarusi likvidavana 22 złačynnyja arhanizacyi (ź ich 21 transnacyjanalnaja) i 83 arhanizavanyja hrupoŭki. Za handal ludźmi i źviazanyja ź im złačynstvy asudžany 2152 čałavieki, u tym liku 784 da pazbaŭleńnia voli.
