Siońnia ŭ Viarchoŭnym sudzie Biełarusi pačaŭsia razhlad kasacyjnaj skarhi pa spravie zabojstva Taćciany Słonimskaj, ździejśnienaha Jaŭhienam Kulikom i Mikałajem Łotyšam 3 lipienia 2013 hoda.
Nahadajem, što 21-hadovy Kulik i 20-hadovy Łotyš zabili žančynu, jakaja pryjechała źbirać jahady pad Minskam, skrali jaje aŭtamabil i pradali pa padrobnych dakumientach u Maskvie.
Za złačynstva Kulik byŭ prysudžany da pažyćciovaha źniavoleńnia ŭ kałonii strohaha riožymu, Łotyš atrymaŭ 7 hadoŭ turmy.
Bok abvinavačvańnia paličyŭ, što Minski abłasny sud nieabhruntavana pierakvalifikaŭ dziejańni Łotyša pa niekalkich artykułach KK i vynies zanadta miakki prysud.
Tamu abvinavačvańnie zapatrabavała skasavać vierdykt suda ŭ dačynieńni da Łotyša i nakiravać spravu na novy razhlad. Prakuror nastojvaje na bolš surovym pakarańni dla Łotyša — 25-hadovym turemnym źniavoleńni. Taksama svajaki Taćciany Słonimskaj patrabujuć spahnać z Łotyša 500 miljonaŭ rubloŭ kampiensacyi.
U hety ž čas Kulik taksama abskardziŭ svoj prysud. Jon ličyć pažyćciovaje źniavoleńnie zanadta žorstkim.
Kulik upeŭnieny, što sud nie ŭličyŭ źmiakčajučych akaličnaściej: jaho małady ŭzrost, charaktarystyki ź miesca pracy i vučoby. Taksama Kulik skazaŭ, što nie žadaŭ prynosić Słonimskaj asablivaja pakuty, a sam jon pamiataje, što nanosiŭ tolki piać udaraŭ nažom z 13.
Kulik paprasiŭ sud zamianić jamu pakarańnie z pažyćciovaha źniavoleńnia na 25-hadovy turemny termin.
Jon patłumačyŭ, što «hetaha času jamu chopić, kab vypravicca».
Rašeńnie ab zadavalnieńni skarhaŭ sudovaja kamisija Viarchoŭnaha suda prymie ŭ aŭtorak, 18 listapada.
