Rabočyja, zvolnienyja z Babrujskaha zavoda traktarnych detalaŭ i ahrehataŭ (BZTDiA), atrymali adkaz na svoj list, adrasavany kiraŭniku dziaržavy, z administracyi pradpryjemstva.
16 kastryčnika dzieviać členaŭ piarvičnaj arhanizacyi Svabodnaha prafsajuza BZTDiA źviarnulisia z adkrytym listom da Alaksandra Łukašenki. Jany abvinavacili dyrektara zavoda Alaksandra Ahranoviča ŭ padryvie ekanamičnaha stanu dziaržavy, bo toj zvalniaje vysokakvalifikavanych rabotnikaŭ, praśledujučy ich z-za prynaležnaści da Svabodnaha prafsajuza.
Žadańnie danieści infarmacyju ab situacyi na zavodzie da kiraŭnika dziaržavy i stała pryčynaj haładoŭki čatyroch zvolnienych rabočych — Mikałaja Žybula, Aleha Šaŭčenki, Alaksandra Varankina i Alaksandra Hramyki. Haładoŭka, nahadajem, pačałasia 5 listapada.
«Amal miesiac my čakali adkazu i, narešcie, jaho atrymali. Z administracyi prezidenta list adpravili na MTZ (BZTDiA uvachodzić u skład vytvorčaha abjadnańnia «MTZ» — BiełaPAN.), MTZ spuściŭ jaho na naš zavod. U vyniku jany nam adpisalisia, što ŭsio narmalna: my vas aptymizavali, čaho vy ad nas chočacie?»
— skazaŭ Mikałaj Žybul.
Pavodle jaho słoŭ, u liście administracyja BZTDiA śćviardžaje, što zvalnieńnie rabočych nie źviazanaje ź ich členstvam u Svabodnym prafsajuzie, bo pryblizna ŭ toj ža čas było zvolniena jašče 60 čałaviek. «Heta ŭsio nadumanaje. U nas na zavodzie vielizarnaja ciakučaść, a zarpłaty maleńkija», — prakamientavaŭ Žybul.
Siońniašni dzień haładoŭki, mabyć, stanie apošnim.
Chacia na zdaroŭje nichto z udzielnikaŭ akcyi pratestu nie skardzicca, sensu praciahvać haładoŭku jany nie bačać, bo, jak adznačyŭ Žybul, na ich skarhu, pasłanuju kiraŭniku dziaržavy, «adkazali tyja, na kaho skardzilisia».
Nahadajem, 12 listapada Alaksandr Hramyka i Mikałaj Žybul pabyvali na pryjomie ŭ staršyni Babrujskaha harvykankama Andreja Kavalenki, jaki taksama admoviŭsia vyrašać pytańnie ich adnaŭleńnia.
«Nichto ź ich navat nie pasprabavaŭ uniknuć u prablemu, prysłuchacca da prostych ludziej. My ž nie zajmajemsia nijakaj palitykaj, my prostyja pracaviki, sprabavali znajści spraviadlivaść u hetaj krainie, akazałasia — jaje niama. Ja adpracavaŭ 30 hadoŭ biez narakańniaŭ, a mnie dali vyśpiatka, nibyta tak i pavinna być»,
— skazaŭ Žybul.
Ciapier zvolnienyja rabočyja rychtujuć vynikovy zvarot, a na 16.00 14 listapada jany vyklikanyja pozvami ŭ milicyju. U pozvach ukazana, što ich vyklikajuć dla składańnia pratakołaŭ ab administracyjnym pravaparušeńni (praviadzieńni niesankcyjanavanaj akcyi).